గవర్నర్కు బీఆర్ఎస్ ఫిర్యాదు
కేటీఆర్ నేతృత్వంలో స్కామ్ వివరాల సమర్పణ
ఫుట్‌బాల్ పేరిట నిధుల దుర్వినియోగం ఆరోపణ
కాంగ్రెస్‌లో వణుకు మొదలైందన్న కేటీఆర్
స్టార్ త్రినేత్రం, హైదరాబాద్: సింగరేణిలో భారీ స్థాయిలో బొగ్గు స్కామ్ జరిగిందని ఆరోపిస్తూ, ఈ మొత్తం వ్యవహారంపై సమగ్ర దర్యాప్తు జరిపించేలా చర్యలు తీసుకోవాలని బీఆర్ఎస్ నేతలు రాష్ట్ర గవర్నర్ జిష్ణు దేవ్ వర్మను కోరారు. బీఆర్ఎస్ వర్కింగ్ ప్రెసిడెంట్ కేటీఆర్ నేతృత్వంలోని పార్టీ బృందం మంగళవారం లోక్ భవన్‌లో గవర్నర్‌ను కలిసి, సింగరేణిలో జరిగినట్టు భావిస్తున్న అవకతవకలపై అధికారికంగా ఫిర్యాదు సమర్పించింది. స్కామ్‌కు సంబంధించిన పలు ఆధారాలు, వివరాలను కూడా గవర్నర్కు అందజేశారు.
గవర్నర్‌ను కలిసిన అనంతరం లోక్ భవన్ వెలుపల కేటీఆర్ మీడియాతో మాట్లాడుతూ.. కాంగ్రెస్ ప్రభుత్వంపై తీవ్ర విమర్శలు గుప్పించారు. ఇప్పటికే సీఎం ఫుట్‌బాల్ మ్యాచ్ పేరిట రూ.10 కోట్ల సింగరేణి నిధులను దుర్వినియోగం చేశారని ఆరోపించి.. ఇప్పుడు మొత్తం సింగరేణి సంస్థతోనే ఫుట్‌బాల్ ఆడుతున్నారని వ్యంగ్యంగా వ్యాఖ్యానించారు. ప్రజల సొమ్ముతో ఆటలాడటం కాంగ్రెస్ ప్రభుత్వానికి అలవాటైందని మండిపడ్డారు.
సీఎం అంటేనే కోల్ మాఫియాకు నాయకుడిగా ప్రజలు భావించే పరిస్థితి వచ్చిందని కేటీఆర్ తీవ్ర స్థాయిలో ధ్వజమెత్తారు. సింగరేణి వంటి ప్రతిష్ఠాత్మక సంస్థను రాజకీయ ప్రయోజనాల కోసం దోపిడీకి గురిచేస్తున్నారని ఆరోపించారు. బీఆర్ఎస్ పార్టీ ఆధారాలతో సహా కాంగ్రెస్ ప్రభుత్వ అవినీతిని బయటపెట్టిన నాటి నుంచే పాలకుల్లో వణుకు మొదలైందన్నారు.
సింగరేణి బొగ్గు స్కామ్ వివరాలను ప్రజల్లోకి తీసుకువచ్చిన తర్వాత కాంగ్రెస్ నాయకుల గుండెల్లో రైళ్లు పరుగెడుతున్నాయన్నారు. అయినప్పటికీ, ఇంతటి తీవ్రమైన ఆరోపణలపై ప్రభుత్వం నుంచి ఇప్పటివరకు సరైన స్పందన రాలేదని విమర్శించారు. ఇది ప్రభుత్వానికి నిజాలపై ఉన్న భయాన్ని స్పష్టంగా చూపుతోందని వ్యాఖ్యానించారు.
ప్రత్యేకంగా ఓబీ టెండర్ల వ్యవహారాన్ని ప్రస్తావించిన కేటీఆర్.. సైట్ విజిట్ సర్టిఫికెట్ నిబంధన పేరిట పారదర్శకతకు పూర్తిగా పాతర వేశారని ఆరోపించారు. దేశంలో ఎక్కడా లేని విధంగా సింగరేణి టెండర్లలో విచిత్రమైన నిబంధనలు పెట్టి, కొందరికే లాభం చేకూరేలా వ్యవస్థను మార్చారని అన్నారు.
ప్రజల దృష్టిని మళ్లించేందుకే ప్రభుత్వం విచారణ పేరుతో ఒక్కొక్కరిని పిలుస్తూ డ్రామాలు ఆడుతోందని కేటీఆర్ ఆరోపించారు. అసలు స్కామ్ మూలాలపై దర్యాప్తు చేయకుండా, చిన్నచిన్న విషయాలతో కాలయాపన చేస్తున్నారని విమర్శించారు. ఇది ప్రజలను మభ్యపెట్టే ప్రయత్నమేనని స్పష్టం చేశారు.
సింగరేణి సంస్థ కార్మికులు, తెలంగాణ ప్రజల భవిష్యత్తుతో చెలగాటం ఆడే ప్రయత్నాలను బీఆర్ఎస్ ఎట్టి పరిస్థితుల్లోనూ సహించదని కేటీఆర్ హెచ్చరించారు. గవర్నర్ జోక్యంతోనైనా స్వతంత్ర, నిష్పక్షపాత దర్యాప్తు జరిపించి నిజాలు బయటకు తీసుకురావాలని డిమాండ్ చేశారు. ఈ స్కామ్ వెనుక ఉన్న వారిని చట్టప్రకారం శిక్షించే వరకు పోరాటం ఆగదని స్పష్టం చేశారు.
ALSO READ: Telangana: మోగిన పురపోరు నగారా
