Auto Drivers: ఆంధ్రప్రదేశ్ ప్రభుత్వం రాష్ట్రవ్యాప్తంగా ఆటో, క్యాబ్ డ్రైవర్లకు ఆర్థిక సాయం అందించబోతోంది. స్త్రీ శక్తి పథకం కారణంగా జీవనోపాధి ఇబ్బందులు ఎదుర్కొంటున్నామని డ్రైవర్లు వినతిపత్రాలు ఇవ్వడంతో, ముఖ్యమంత్రి చంద్రబాబు సానుకూలంగా స్పందించారు. ఫలితంగా “ఆటో డ్రైవర్ల సేవలో” అనే కొత్త పథకాన్ని ప్రకటించి, ప్రతి సంవత్సరం రూ.15,000 ఆర్థిక సాయం అందజేయనున్నట్లు ప్రకటించారు.
ఈ పథకం కింద అక్టోబర్ 2 గాంధీ జయంతి రోజున మొత్తం 3,10,385 మంది డ్రైవర్ల ఖాతాల్లో డబ్బు జమ కానుంది. ఈ మేరకు క్షేత్ర స్థాయి పరిశీలన పూర్తిచేసి అర్హుల జాబితా ఖరారు చేశారు. పథకం అమలుతో ప్రభుత్వంపై సుమారు రూ.466 కోట్ల భారం పడనుంది.
డ్రైవర్లు తమ పేరు జాబితాలో ఉందో లేదో, స్టేటస్ తెలుసుకోవడానికి ప్రభుత్వం ప్రత్యేక సౌకర్యం కల్పించింది. ఈ స్టేటస్ చెక్ చేసేందుకు లాగిన్ అవసరం లేదు. ఆధార్ నంబర్‌తోనే వివరాలు తెలుసుకోవచ్చు.
స్టేటస్ చెక్ చేసే విధానం:
ముందుగా NBM అధికారిక వెబ్‌సైట్ ఓపెన్ చేయాలి.
Home పేజీలో “Application Status / Public Navasakam Application Status” ఎంపిక చేసుకోవాలి.
Scheme Dropdown లో “Financial Assistance to Auto and Maxi Cab Owners (Auto Driver Sevalo / Vahana Mitra)” ఎంచుకోవాలి.
12 అంకెల ఆధార్ నంబర్, క్యాప్చా కోడ్ నమోదు చేయాలి.
ఆధార్‌కు లింక్ అయిన మొబైల్ నంబర్‌కి వచ్చే OTP ఎంటర్ చేసి Submit / Check Status క్లిక్ చేయాలి.
వెంటనే Application Status స్క్రీన్‌పై కనిపిస్తుంది. దీంతో ఆటో, క్యాబ్ డ్రైవర్లు తాము అర్హుల జాబితాలో ఉన్నారో లేదో సులభంగా తెలుసుకోవచ్చు.