Viral Post: నేటి కాలంలో లింక్డ్‌ఇన్ ప్రొఫైల్స్ అన్నీ “Visionary Leader”, “Strategic Innovator” వంటి అద్భుతమైన స్టేట్మెంట్ తో ఉండడం చూస్తూనే ఉన్నాం. అయితే నోయిడాకు చెందిన అనిల్ బవేజా మాత్రం ఈ ప్రొఫెషనల్ నెట్‌వర్కింగ్ ప్లాట్‌ఫామ్‌ను హృదయానికి హత్తుకునే హాస్యానికి వేదికగా మార్చారు. ఆటోమొబైల్ రంగంలో పెద్ద పదవులు దక్కించుకున్న ఈ మాజీ అధికారి, ఇప్పుడు తన ప్రొఫైల్‌లో తన ప్రస్తుత ఉద్యోగం “Assistant to my wife” అని నమోదు చేశారు.
ఈ మధురమైన ప్రకటనకు సంబంధించిన స్క్రీన్‌షాట్‌ను Redditలోని r/LinkedInLunatics కమ్యూనిటీలో ఒకరు షేర్ చేయగానే అది క్షణాల్లో వైరల్ అయింది. వేలాదిమంది వీక్షకులు చూసి చప్పట్లు కొడుతూ, ఈ స్టేట్మెంట్ తమకు దగ్గరగా ఉందని కామెంట్లు పెడుతున్నారు.
అనిల్ బవేజా లింక్డ్‌ఇన్ ప్రొఫైల్ ప్రకారం, ఆయనకు Honda Cars Indiaలో 16 ఏళ్లకు పైగా అనుభవం ఉంది. మార్కెటింగ్ & స్ట్రాటజీ విభాగంలో Operating Head స్థాయి వరకు ఎదిగారు. ఆ తర్వాత మరో ఆటోమొబైల్ కంపెనీలో జనరల్ మేనేజర్‌గా పనిచేశారు. అయితే 2023 ఆగస్టులో కార్పొరేట్ రేస్ నుంచి బయటకు వచ్చి, వ్యక్తిగత జీవితాన్ని ముందుకు పెట్టుకున్నారు. తన కొత్త బాధ్యతను సరదాగా “trainee position” అని లింక్డ్‌ఇన్ బయోలో పేర్కొన్నారు.
పోస్ట్ వైరల్
రెడిట్‌లో షేర్ అయిన ఈ పోస్ట్‌కు యూజర్ల నుంచి విపరీతమైన స్పందన వచ్చింది. లింక్డ్‌ఇన్‌లో ఫ్యాన్సీ టైటిల్స్ పెట్టుకునే వారితో పోలిస్తే, నిజాయితీగా వ్యవహరించినందుకు అనిల్ బవేజాను “లెజెండ్”గా పేర్కొన్నారు.
ఒక యూజర్ – “ఇది లూనాటిక్ కాదు, లెజెండ్” అని రాశాడు. మరొకరు – “మాకు ఇలాంటి నిజాయితీ గల వ్యక్తే నచ్చుతాడు” అన్నారు. మరొకరు సరదాగా – “అదే నా భర్త జాబ్ కూడా. కానీ ఇక్కడి పెర్ఫార్మెన్స్ రివ్యూలు మాత్రం కాస్త ఇబ్బందిగా ఉంటాయి” అని కామెంట్ చేశారు.