Journalist: పారిస్ నగరంలోని ఓ శ్మశానంలో ప్రతీ రోజూ ఒక విభిన్న దృశ్యం చోటుచేసుకుంటుంది. అక్కడ ఉన్న ఒక కాంస్య విగ్రహం ముందు మహిళలు బారులు తీరుతారు. ఆ విగ్రహానికి ముద్దు పెడితే పిల్లలు పుడతారని వారు నమ్ముతారు. ఇది సాధారణ విశ్వాసం కాదు, దశాబ్దాలుగా కొనసాగుతున్న ఒక ఆసక్తికరమైన ఆచారం. ఈ విగ్రహం ఒక జర్నలిస్టు స్మారకంగా ఏర్పాటుచేయబడింది. ఆ జర్నలిస్టు పేరు విక్టర్ నొయిర్. ఆయన అసలు పేరు వైవన్ సాల్మన్. ఫ్రాన్స్‌లో 19వ శతాబ్దంలో రాజ్యవ్యవస్థకు వ్యతిరేకంగా తన కలంతో గళం వినిపించిన ధైర్యవంతుడైన పాత్రికేయుడు ఆయన. ప్రజల హక్కుల కోసం కలం పట్టి రాసినందుకు ఆయనను రాచరికానికి చెందినవారు ద్వేషించారు.
1870లో ఫ్రాన్స్ చక్రవర్తి నెపోలియన్ మూడవ బంధువైన ప్రిన్స్ పియర్ బోనపార్టే విక్టర్ నొయిర్‌ను తుపాకీతో కాల్చి చంపాడు. ఈ హత్య దేశవ్యాప్తంగా ఆగ్రహం రగిలించింది. ప్రజలు వేలాదిమంది ఆయన అంత్యక్రియలకు హాజరై రాచరిక పాలనపై నిరసన వ్యక్తం చేశారు. కొన్నేళ్ల తరువాత ఆయన స్మారకార్థం ఒక విగ్రహం ఏర్పాటు చేశారు. విగ్రహం నిలువుగా కాకుండా నేలపై పడిపోయిన భంగిమలో, ఆయన టోపీ పక్కన పడినట్లు చెక్కారు.
మొదట్లో ఆయనకు గౌరవం తెలిపే ఉద్దేశ్యంతో ప్రజలు ఆ విగ్రహాన్ని తాకి, ముద్దు పెట్టేవారు. కానీ కొంతకాలానికి ఆ విగ్రహానికి ముద్దు పెట్టిన కొందరు మహిళలకు గర్భం దాల్చినట్లు ప్రచారం మొదలైంది. ఆ మాట ప్రజల్లో వేగంగా వ్యాపించి, సంతానం కోరిక కలిగిన మహిళలు పెద్ద సంఖ్యలో అక్కడికి చేరుకుంటూ ముద్దులు పెట్టడం ప్రారంభించారు. ఆ ప్రదేశం ఒక రకమైన ఆధ్యాత్మిక విశ్వాస కేంద్రంగా మారిపోయింది.
ఈ ఆచారాన్ని మూఢనమ్మకం అంటూ అధికారులు 2004లో సమాధి చుట్టూ కంచె వేసారు. కానీ ఆ నిర్ణయాన్ని మహిళలు తీవ్రంగా వ్యతిరేకించారు. నిరసనలు, ఆందోళనలు జరిగాయి. చివరికి ప్రజా ఒత్తిడికి ప్రభుత్వం తలవంచి ఆ కంచెను తొలగించాల్సి వచ్చింది.
ఇప్పటికి విక్టర్ నొయిర్ సమాధి పారిస్‌లో ఒక ప్రసిద్ధ పర్యాటక కేంద్రంగా మారింది. కొందరు సంతాన భాగ్యం కోసం అక్కడికి వెళ్తుంటే, మరికొందరు ఆయన చరిత్రను తెలుసుకోవాలనే ఆసక్తితో ఆ ప్రదేశాన్ని సందర్శిస్తున్నారు. కాలం మారినా, ఆ విగ్రహం ముందు నిలబడే విశ్వాసం మాత్రం తరుగని నమ్మకంగా అక్కడి మహిళల హృదయాల్లో నిలిచిపోయింది.
ALSO READ: Interesting fact: తీర్థం, క్షేత్రాల మధ్య తేడా ఏమిటో తెలుసా?
Journalist: ఈ జర్నలిస్టుకి ముద్దిస్తే పిల్లలు పుడతారట?.. ఎక్కడో తెలుసా?