Emergency Alert: శనివారం ఉదయం 11 నుంచి 12 గంటల మధ్య దేశవ్యాప్తంగా మొబైల్ వినియోగదారులందరికీ కేంద్ర ప్రభుత్వం పంపించిన అత్యవసర అలర్ట్ సందేశాలు పెద్ద ఎత్తున చర్చకు దారితీశాయి. ఒక్కసారిగా మొబైల్ ఫోన్లలో బీప్ శబ్దం వినిపించడంతో చాలామంది ఆశ్చర్యానికి గురయ్యారు. సుమారు 10 సెకన్ల పాటు వినిపించిన ఈ శబ్దంతో పాటు వచ్చిన సందేశం అత్యవసర పరిస్థితుల్లో ప్రజలను అప్రమత్తం చేయడానికి రూపొందించిన వ్యవస్థకు సంబంధించినదిగా అధికారులు వివరించారు. భవిష్యత్తులో ప్రకృతి వైపరీత్యాలు లేదా ఇతర అత్యవసర పరిస్థితులు ఏర్పడినప్పుడు ప్రజలకు వేగంగా సమాచారం చేరవేయడం లక్ష్యంగా ఈ విధానాన్ని దేశవ్యాప్తంగా పరీక్షించారు. సెల్ బ్రాడ్‌కాస్ట్ విధానాన్ని ఉపయోగించి టెలికాం విభాగం ఈ సందేశాలను పంపినట్లు వెల్లడించింది.
అయితే కొంతమంది వినియోగదారులకు ఈ అలర్ట్ సందేశాలు అందకపోవడం గమనార్హంగా మారింది. దీనికి ప్రధాన కారణం వారి ఫోన్లలో అత్యవసర అలర్ట్ సెట్టింగ్ నిలిపివేయబడినట్లుగా నిపుణులు చెబుతున్నారు. ఈ ప్రత్యేక ఫీచర్‌ను ఆన్ చేసుకుంటే భూకంపాలు, వరదలు, భారీ వర్షాలు వంటి విపత్తుల సమయంలో ముందుగానే హెచ్చరికలు అందుతాయి. నెట్‌వర్క్ సిగ్నల్ తక్కువగా ఉన్నప్పటికీ ఈ వ్యవస్థ పని చేయగలగడం దీని ప్రత్యేకతగా చెప్పవచ్చు. మొబైల్ టవర్ పరిధిలో ఉన్న ఫోన్లకు నేరుగా సందేశాలు చేరే విధంగా ఈ సాంకేతికత పనిచేస్తుంది. ఫోన్ సైలెంట్‌లో ఉన్నా కూడా బీప్ శబ్దం వినిపించడం వల్ల వినియోగదారులు తప్పక గమనించేలా ఉంటుంది. ముఖ్యంగా దీనికి ఎలాంటి చందా అవసరం లేకుండా ఉచితంగానే ఉపయోగించుకోవచ్చు.
ప్రతి ఒక్కరూ తమ భద్రత దృష్ట్యా ఈ ఫీచర్‌ను తప్పనిసరిగా ఆన్ చేసుకోవాలని నిపుణులు సూచిస్తున్నారు. ఫోన్ సెట్టింగ్స్‌లోకి వెళ్లి భద్రత, అత్యవసర విభాగాన్ని ఎంచుకుని అక్కడ ఉన్న వైర్‌లెస్ అత్యవసర అలర్ట్ ఎంపికను ఆన్ చేయడం ద్వారా ఈ సేవను పొందవచ్చు. అలర్ట్ అనుమతులను ఆన్ చేసిన వెంటనే ఈ వ్యవస్థ పనిచేయడం ప్రారంభమవుతుంది. భవిష్యత్తులో ఏదైనా ప్రమాదం సంభవించే ముందు ముందస్తు హెచ్చరికలు అందుకోవడం ద్వారా ప్రాణ నష్టం, ఆస్తి నష్టాన్ని తగ్గించుకోవచ్చని అధికారులు స్పష్టం చేస్తున్నారు.
ALSO READ: Weather Update: ఈ నెలలో మండుటెండలు కాదు.. ముంచెత్తే వానలు
