Nandini Sharma: భారత మహిళల క్రికెట్‌లో ప్రస్తుతం ఒక యువ మహిళా ప్లేయర్ పేరు గట్టిగా వినిపిస్తోంది. ఆ పేరు నందినీ శర్మ. 2001 సెప్టెంబర్ 20న చండీగఢ్‌లో జన్మించిన ఈ యువ బౌలర్ తక్కువ ధరకు జట్టులోకి వచ్చినప్పటికీ తన ప్రతిభతో దేశవ్యాప్తంగా గుర్తింపు సంపాదించింది. మహిళల ప్రీమియర్ లీగ్ 2026లో కేవలం రూ.20 లక్షల కనీస ధరకు ఢిల్లీ జట్టులో చోటు దక్కించుకున్న నందినీ, తన అద్భుత ప్రదర్శనతో అందరినీ ఆశ్చర్యానికి గురిచేసింది. ఈ లీగ్‌లో ఆడిన 10 మ్యాచ్‌లలో 17 వికెట్లు తీసి తన ప్రతిభను చాటుకుంది. అదే టోర్నీలో హ్యాట్రిక్ వికెట్లు సాధించడంతో పాటు ఐదు వికెట్లు పడగొట్టిన తొలి భారతీయ బౌలర్‌గా చరిత్ర సృష్టించింది.
ఇక ప్రపంచకప్ పోరుకు సిద్ధమవుతున్న భారత మహిళల జట్టు కూడా బలంగా కనిపిస్తోంది. జట్టు నాయకత్వ బాధ్యతలను హర్మన్‌ప్రీత్ కౌర్ నిర్వహిస్తుండగా, ఉప నాయకురాలిగా స్మృతి మంధాన కొనసాగనుంది. గత ఏడాది వన్డే ప్రపంచకప్ విజయంతో ఉత్సాహంగా ఉన్న జట్టు, ఇప్పుడు టీ20 ప్రపంచకప్‌ను లక్ష్యంగా పెట్టుకుంది. జూన్ 12 నుంచి ఇంగ్లాండ్ వేదికగా జరగనున్న ఈ పోటీలు భారత జట్టుకు మరో సవాల్‌గా మారనున్నాయి. బ్యాటింగ్ విభాగంలో షఫాలీ వర్మ, జెమిమా రోడ్రిగ్స్, రిచా ఘోష్ వంటి ఆటగాళ్లు బలంగా ఉండగా, బౌలింగ్ విభాగంలో దీప్తి శర్మ, రేణుకా సింగ్ కీలక పాత్ర పోషించనున్నారు.
అయితే జట్టు ఎంపికలో గాయాల ప్రభావం స్పష్టంగా కనిపించింది. కీలక ఆటగాళ్లైన కాశ్వి గౌతమ్, అమంజోత్ కౌర్ గాయాల కారణంగా ఈ పోటీలకు దూరమయ్యారు. అలాగే ప్రతిభావంతురాలైన ప్రతిక రావల్‌కు ఈసారి టీ20 జట్టులో చోటు దక్కలేదు. అయితే ఆమెను ఇంగ్లాండ్‌తో జరిగే ఏకైక టెస్టు మ్యాచ్ కోసం ఎంపిక చేశారు. ప్రపంచకప్‌కు ముందు మే 28 నుంచి ఆతిథ్య జట్టుతో భారత్ మూడు మ్యాచ్‌ల టీ20 సిరీస్ కూడా ఆడనుంది.
భారత మహిళల టీ20 ప్రపంచకప్ జట్టు ఇదే: హర్మన్‌ప్రీత్ కౌర్ (కెప్టెన్), స్మృతి మంధాన (వైస్ కెప్టెన్), షఫాలీ వర్మ, జెమిమా రోడ్రిగ్స్, భారతి ఫుల్మాలి, దీప్తి శర్మ, రిచా ఘోష్ (వికెట్ కీపర్), శ్రీ చరణి, యాస్తికా భాటియా, నందినీ శర్మ, అరుంధతి రెడ్డి, రేణుకా సింగ్, క్రాంతి గౌడ్, శ్రేయాంక పాటిల్, రాధా యాదవ్.
ALSO READ: Hyderabad: కొత్త వైద్య విప్లవం.. సనత్‌నగర్‌ టిమ్స్‌లో ఓపీ షురూ
