Actress Abhinaya: సినిమా రంగంలో ప్రతిభ ఉంటే ఎలాంటి అడ్డంకులు వచ్చినా దాటుకుని ముందుకు సాగవచ్చని నిరూపించిన అరుదైన నటీమణుల్లో అభినయ ఒకరు. అందం, రంగు, ఎత్తు వంటి అంశాలు మాత్రమే విజయానికి ప్రమాణాలు కావని తన ప్రయాణంతో ఆమె స్పష్టంగా చూపించారు. చిన్న వయసు నుంచే వినికిడి మరియు మాటల లోపంతో బాధపడుతున్నప్పటికీ, తన హావభావాలతోనే భావాలను అద్భుతంగా వ్యక్తపరచగలిగే ప్రత్యేక ప్రతిభను అభినయ సంపాదించారు. ఎన్నో విజయవంతమైన చిత్రాల్లో నటిస్తూ ప్రేక్షకుల హృదయాలను గెలుచుకున్నారు. ఇటీవల ఆమె తన తండ్రి ఆనంద్తో కలిసి ఒక కార్యక్రమంలో పాల్గొని, తన జీవిత ప్రయాణం, కుటుంబం అందించిన సహకారం, సినీ రంగంలో ఎదుర్కొన్న సవాళ్లు, సాధించిన విజయాల గురించి విశదంగా పంచుకున్నారు. పుట్టుకతోనే వినికిడి లోపంతో ఉన్నప్పటికీ అసాధారణమైన పట్టుదలతో, కుటుంబ సభ్యుల మద్దతుతో అభినయ ఒక స్థాయి నటిగా ఎదిగిన తీరు ఎంతో ప్రేరణాత్మకంగా నిలిచింది.
అభినయ తండ్రి ఆనంద్ స్వయంగా నటుడిగా ఉన్నప్పటికీ, తన కుమార్తె ప్రతిభను ముందుగానే గుర్తించి ఆమెను సినిమాల్లోకి తీసుకురావడానికి ఎన్నో కష్టాలు పడ్డారు. దేవుడు అందం ఇచ్చినా మాట ఇవ్వలేదని భావోద్వేగంతో ఆయన వెల్లడించారు. ఒక మూగ బాలికను సినిమాల్లోకి తీసుకురావడం అసాధ్యమని, అది పిచ్చితనమని చాలా మంది విమర్శించినా ఆయన వెనక్కి తగ్గలేదు. తన కుమార్తె భవిష్యత్తు కోసం పట్టుదలతో ముందుకు సాగారు. అభినయ తల్లి కూడా ఆమెకు అండగా నిలిచి, ప్రతి సంభాషణను అర్థం చేసుకునేలా చేసి, షూటింగ్కు ముందు నటన, హావభావాలను నిరంతరం సాధన చేయించడంలో కీలక పాత్ర పోషించారు. మరోవైపు ఆనంద్ కథల ఎంపిక, చిత్రీకరణ సమయాల నిర్వహణ వంటి బాధ్యతలను చూసుకుంటూ ఆమె కెరీర్ను సక్రమంగా తీర్చిదిద్దారు. తన సినీ ప్రయాణంలో సముద్రఖని మార్గదర్శకుడిగా నిలిచారని అభినయ వెల్లడించారు. ఆయన సహాయం లేకపోతే తాను ఈ రంగంలోకి రాలేదని కృతజ్ఞతాభివందనలు తెలిపారు.
అభినయ తన వినికిడి లోపాన్ని ఎప్పుడూ బలహీనతగా భావించలేదని ఆమె తండ్రి ఆనంద్ వివరించారు. అది తనకు సహజమైన పరిస్థితి మాత్రమేనని భావిస్తూ ధైర్యంగా ముందుకు సాగిందని చెప్పారు. చిన్నప్పటి నుంచి ఎన్నో సవాళ్లను ఎదుర్కొన్న ఆమె, 3 సంవత్సరాల వయసు వరకు నడవలేకపోయినా ఆ తర్వాత తన జీవితంలో వెనక్కి తిరిగి చూడలేదు. వినికిడి లోపం ఉన్నవారిని తప్పుగా అర్థం చేసుకుంటూ ఉండే అభిప్రాయాలపై కూడా ఆనంద్ స్పష్టత ఇచ్చారు. వినికిడి లోపం ఉన్నంత మాత్రాన వారు మాట్లాడలేరనే అపోహ తప్పని, వారికి సరైన పద్ధతిలో శిక్షణ ఇస్తే సాధారణంగా కమ్యూనికేట్ చేయగలరని వివరించారు. ప్రముఖ నటుడు రజినీకాంత్ వంటి దిగ్గజాలు అభినయ నటనను ప్రశంసించగా, శివకుమార్, అల్లు అర్జున్, మహేష్ బాబు, వెంకటేష్ వంటి ప్రముఖ నటులతో కలిసి పనిచేసిన అనుభవాలను కూడా ఆమె గుర్తుచేసుకున్నారు. తన ప్రతిభతోనే కాదు, తన ధైర్యంతో కూడా అభినయ ఎంతో మందికి ఆదర్శంగా నిలుస్తోంది.
ALSO READ: Maruti Suzuki Alto K10: కేవలం రూ.3.70 లక్షలకే కారు..
Last Updated on April 19, 2026 · 2:48 PM by Sandeep Kumar
