War Effect: పశ్చిమాసియాలో కొనసాగుతున్న యుద్ధ పరిస్థితులు ప్రపంచవ్యాప్తంగా ఆర్థిక రంగంపై ప్రభావం చూపుతున్న నేపథ్యంలో, దేశంలోనూ నిత్యావసర వస్తువుల ధరలు పెరుగుతాయన్న భయంతో ప్రజలు ముందస్తుగా భారీగా కొనుగోళ్లు చేపడుతున్నారు. గ్యాస్ కొరత ఏర్పడుతుందన్న ఆందోళనతో పాటు నూనెలు, పప్పులు, ఇతర అవసరమైన సరుకులను నిల్వ చేసుకునే ధోరణి పెరిగింది. ముఖ్యంగా పెట్రోల్, డీజిల్ కొనుగోళ్ల కోసం పలుచోట్ల ప్రజలు బారులు తీరుతున్న దృశ్యాలు కనిపిస్తున్నాయి. ఈ పరిస్థితి కారణంగా డిమాండ్ ఒక్కసారిగా పెరిగి, ధరలు మరింత పెరిగే ప్రమాదం ఉందన్న ఆందోళన వ్యక్తమవుతోంది. అయితే దేశంలో ఆహార పదార్థాలు, ఎరువులు, ఇంధన నిల్వలు సమృద్ధిగా ఉన్నాయని కేంద్ర ప్రభుత్వం స్పష్టం చేస్తూ, ప్రజలు అనవసర భయాలకు లోనవ్వవద్దని సూచిస్తోంది.
ఇదే సమయంలో దేశవ్యాప్తంగా లాక్‌డౌన్ విధించబోతున్నారన్న వదంతులు సోషల్ మీడియా ద్వారా వేగంగా వ్యాప్తి చెందడంతో ప్రజల్లో మరింత గందరగోళం నెలకొంది. ఈ అంశంపై కేంద్ర పెట్రోలియం మరియు సహజ వాయువు శాఖ మంత్రి హర్దీప్ సింగ్ పూరి స్పందిస్తూ, అలాంటి ఎలాంటి ప్రతిపాదన ప్రభుత్వం వద్ద లేదని స్పష్టంగా వెల్లడించారు. లాక్‌డౌన్ గురించి ప్రచారం జరుగుతున్న వార్తలు పూర్తిగా అసత్యమని ఆయన కొట్టిపారేశారు. సోషల్ మీడియా వేదికగా వ్యాపిస్తున్న ఈ వదంతులు ప్రజల్లో అనవసర భయాందోళనలు సృష్టించే బాధ్యతారహిత చర్యలుగా ఆయన అభివర్ణించారు.
The global situation remains in flux, and we are closely monitoring developments across energy, supply chains, and essential commodities on a real-time basis.
Under the leadership of Hon’ble PM @narendramodi Ji, all necessary steps are being taken to ensure uninterrupted…
— Hardeep Singh Puri (@HardeepSPuri) March 27, 2026
పశ్చిమాసియా యుద్ధం వల్ల ఎదురయ్యే సవాళ్లను సమర్థంగా ఎదుర్కొనేందుకు కేంద్ర ప్రభుత్వం పూర్తిగా సిద్ధంగా ఉందని హర్దీప్ సింగ్ పూరి పేర్కొన్నారు. ఇలాంటి పరిస్థితుల్లో ప్రజలు ప్రశాంతంగా, బాధ్యతాయుతంగా వ్యవహరించడం అత్యంత అవసరమని ఆయన సూచించారు. వదంతులను నమ్మి ఆందోళనకు గురికాకుండా, నిజమైన సమాచారం మాత్రమే విశ్వసించాలని ప్రజలకు సూచించారు. ఇంధన సరఫరా, నిత్యావసర వస్తువుల అందుబాటు వంటి అంశాలను కేంద్రం నిరంతరం పర్యవేక్షిస్తోందని తెలిపారు.
దేశవ్యాప్తంగా ఇంధనం, విద్యుత్, ఇతర కీలక సేవలు ఎలాంటి అంతరాయం లేకుండా అందేలా అన్ని చర్యలు తీసుకున్నామని కేంద్ర ప్రభుత్వం హామీ ఇచ్చింది. అంతర్జాతీయ స్థాయిలో ఏర్పడిన అనిశ్చిత పరిస్థితుల మధ్య కూడా భారతదేశం తన సరఫరా వ్యవస్థను దృఢంగా కొనసాగిస్తోందని వెల్లడించింది. క్రూడ్ ఆయిల్, పెట్రోల్, డీజిల్, ఎల్పీజీ వంటి ఇంధనాల సరఫరా పూర్తిగా భద్రంగా ఉందని, గతంలో పార్లమెంటులో కూడా ఇదే విషయాన్ని స్పష్టం చేసినట్లు తెలిపింది. దేశంలోని రిఫైనరీలు పూర్తి సామర్థ్యంతో పనిచేస్తున్నాయని, అవసరమైన చోట ప్రత్యామ్నాయ మార్గాల ద్వారా సరఫరా నిరంతరం కొనసాగుతోందని కేంద్రం వెల్లడించింది.
ALSO READ: Maharashtra: ట్రాన్స్ మహిళతో మంత్రి రాసలీలలు!
