Tollywood Celebrity: టాలీవుడ్‌లో చాలా కాలంగా వినిపిస్తూ వస్తున్న చర్చలకు ఇప్పుడు మరింత ఊపు వచ్చినట్లైంది. ప్రముఖ హీరో విజయ్ దేవరకొండ, ప్రముఖ హీరోయిన్ రష్మిక మందనా ఇద్దరూ ఒకరినొకరు ఇష్టపడుతున్నారనే వార్తలు గత కొన్ని సంవత్సరాలుగా ప్రచారంలో ఉన్నప్పటికీ, ఈ జంట మాత్రం ఎప్పుడూ బహిరంగంగా స్పందించలేదు. అయితే తాజాగా తమ వివాహంపై స్పష్టత ఇచ్చారనే వార్త సినీ వర్గాల్లో చర్చనీయాంశంగా మారింది. వీరి వివాహం ఫిబ్రవరి 26న రాజస్థాన్ రాష్ట్రంలోని అద్భుతమైన రాజభవన వాతావరణం కలిగిన ఉదయపూర్ ప్యాలెస్‌లో జరుగుతుంది. అత్యంత సన్నిహితులు, కుటుంబ సభ్యులు మాత్రమే ఈ వేడుకకు హాజరుకానున్నారని తెలుస్తోంది. ఆ తరువాత హైదరాబాద్‌లో చిత్ర పరిశ్రమకు చెందిన స్నేహితులు, సహనటులు, ప్రముఖుల కోసం ప్రత్యేక విందు ఏర్పాటు చేయనున్నట్లు ప్రచారం జరుగుతోంది.
వివాహానికి ముందుగా జరిగే పసుపు, గోరింటాకు, సంగీత వేడుకలు ఇప్పటికే ప్రారంభమైనట్లు సమాచారం. పెళ్లి వేడుక రెండు వేర్వేరు సంప్రదాయాల ప్రకారం నిర్వహించనున్నారనే వార్త ఆసక్తిని రేకెత్తిస్తోంది. నటుడి కుటుంబ సంప్రదాయం ప్రకారం తెలుగు పద్ధతిలో మంగళసూత్ర ధారణ, తాళంబ్రాలు, కంకణబంధనం వంటి కార్యక్రమాలు జరగనున్నాయని చెబుతున్నారు. అదే సమయంలో నటి కుటుంబానికి చెందిన కొడవ సంప్రదాయం ప్రకారం ప్రత్యేక రీతిలో వివాహం నిర్వహించనున్నట్లు సమాచారం. ఈ నేపథ్యంలో వివాహానికి అవసరమైన ఏర్పాట్లు వేగంగా జరుగుతున్నాయని, ఆచార విధానాల నిర్వహణకు అవసరమైన పెద్దలు, పూజా కార్యక్రమాలకు సంబంధించిన వారు అక్కడికి చేరుకున్నారని తెలుస్తోంది.
ఇక పెళ్లి విందుకు సంబంధించిన వార్తలు మరింత ఆసక్తిని కలిగిస్తున్నాయి. సోషల్ మీడియాలో ప్రచారం అవుతున్న సమాచారం ప్రకారం కొడవ సంప్రదాయంలో పెళ్లి సందర్భంగా పంది మాంసం వడ్డించడం ఆనవాయితీగా ఉందని చెబుతున్నారు. అందువల్ల ఈ వివాహంలో కూడా అతిథులకు ప్రత్యేకంగా పంది మాంస వంటకాలు అందించనున్నారనే చర్చ సాగుతోంది. ఇంట్లో పెంచిన పందిని ఉపయోగించడం ఆ సంప్రదాయంలో భాగమని పేర్కొంటున్నారు. అదనంగా కదంబుట్టు, వెదురు మొగ్గల కూర వంటి సంప్రదాయ వంటకాలు కూడా మెనూలో ఉండనున్నట్లు వార్తలు వినిపిస్తున్నాయి.
మరొక విశేషం ఏమిటంటే.. కొడవ సంప్రదాయం ప్రకారం వివాహ వేడుకను పురోహితులు నిర్వహించరని, కుటుంబంలోని పెద్దలే ప్రధాన బాధ్యతలు చేపట్టి వివాహం జరిపిస్తారని సమాచారం. ఈ అంశం కూడా ప్రస్తుతం చర్చనీయాంశంగా మారింది. అయితే ఈ వివరాలపై అధికారిక ప్రకటన వెలువడాల్సి ఉంది. ప్రస్తుతం మాత్రం ఈ స్టార్ జంట వివాహం సినీ వర్గాల్లో హాట్ టాపిక్‌గా మారింది.
ALSO READ: AP Liquor Scam: సిట్ ఎదుట లొంగిపోయిన అవినాష్ రెడ్డి
