ఆంధ్రప్రదేశ్లోని తిరుపతి జిల్లా రైల్వే కోడూరులో బాలికల పాఠశాల విద్యార్థినులు ఎదుర్కొంటున్న ఈవ్ టీజింగ్ సమస్యపై మంత్రి నారా లోకేశ్ స్పందించారు. పాఠశాలకు వెళ్లే సమయంలో కొందరు ఆకతాయిలు వేధింపులకు పాల్పడుతున్నారంటూ విద్యార్థినులు చేసిన ఫిర్యాదులపై ఆయన తీవ్రంగా స్పందించారు. వెంటనే చర్యలు తీసుకోవాలని జిల్లా కలెక్టర్, పోలీసు అధికారులను ఆదేశించారు.
మంత్రి నారా లోకేశ్ ఆదేశాల మేరకు రైల్వే కోడూరు పోలీసులు బాలికల పాఠశాలను సందర్శించారు. అక్కడ విద్యార్థినులు, ఉపాధ్యాయులతో సర్కిల్ ఇన్స్పెక్టర్ మాట్లాడి సమస్యల గురించి వివరాలు సేకరించారు. విద్యార్థినులు ధైర్యంగా ఉండాలని, వారి భద్రతకు పోలీసులు పూర్తి బాధ్యత తీసుకుంటారని భరోసా ఇచ్చారు.
పాఠశాలకు వెళ్లే సమయంలో ఎదురవుతున్న వేధింపుల గురించి భయపడకుండా పోలీసులకు సమాచారం అందించాలని సూచించారు. ఇలాంటి ఘటనలను ఏమాత్రం ఉపేక్షించబోమని స్పష్టం చేశారు.
ఈ ఘటనపై తిరుపతి జిల్లా ఎస్పీ కూడా స్పందించారు. బాలికలను వేధించే వారిని గుర్తించి కఠిన చర్యలు తీసుకోవాలని పోలీసు అధికారులను ఆదేశించారు. ఈవ్ టీజింగ్తో పాటు మహిళలు, బాలికల పట్ల అసభ్యంగా ప్రవర్తించే వారిపై చట్టప్రకారం చర్యలు తీసుకుంటామని హెచ్చరించారు.
విద్యార్థినులు ఎలాంటి భయం లేకుండా పాఠశాలలకు వెళ్లేలా భద్రత కల్పించాలని మంత్రి నారా లోకేశ్ అధికారులకు సూచించారు. బాలికల భద్రత విషయంలో నిర్లక్ష్యం వహించవద్దని స్పష్టం చేశారు.