ఎలక్ట్రిక్ స్కూటర్లకు మార్కెట్లో రోజురోజుకూ ఆదరణ పెరుగుతోంది. పెట్రోల్ వాహనాలకు ప్రత్యామ్నాయంగా ఎలక్ట్రిక్ ద్విచక్ర వాహనాలను కొనుగోలు చేసేందుకు వినియోగదారులు ఆసక్తి చూపిస్తున్నారు. ఈ నేపథ్యంలో ప్రముఖ ద్విచక్ర వాహన బ్రాండ్ లాంబ్రెట్టా (Lambretta) కూడా ఎలక్ట్రిక్ వాహన రంగంలోకి అడుగుపెట్టింది. EICMA 2026 వేదికగా తన సరికొత్త ఎలక్ట్రిక్ స్కూటర్ లాంబ్రెట్టా ఎలెట్రా ఎస్ (Elettra S)ను ప్రదర్శించింది. పాతకాలపు క్లాసిక్ డిజైన్‌కు ఆధునిక ఎలక్ట్రిక్ టెక్నాలజీని జోడించి ఈ స్కూటర్‌ను రూపొందించింది.
లాంబ్రెట్టా ఎలెట్రా ఎస్ స్కూటర్‌ను చూడగానే ఆ బ్రాండ్ పాతకాలపు స్కూటర్లు గుర్తుకొస్తాయి. ఇందులో ఫిక్స్‌డ్ టైప్ ఫ్రంట్ మడ్‌గార్డ్, ట్రైలింగ్ లింక్ ఫ్రంట్ సస్పెన్షన్, దీర్ఘచతురస్రాకార హెడ్‌ల్యాంప్ వంటి ప్రత్యేక డిజైన్ అంశాలను అందించారు. ఇవి లాంబ్రెట్టా పాత మోడళ్ల డిజైన్‌ను గుర్తుచేస్తాయి.
అదేవిధంగా రెట్రో స్టైల్‌ను ప్రతిబింబించే డిజిటల్ ఇన్‌స్ట్రుమెంట్ క్లస్టర్‌ను కూడా ఏర్పాటు చేశారు. పాతకాలపు డిజైన్ ఆకృతిని కొనసాగిస్తూనే ఆధునిక డిజిటల్ టెక్నాలజీని ఇందులో జోడించారు. ఫ్లోటింగ్ సీట్ డిజైన్ ఈ స్కూటర్‌కు మరో ప్రత్యేక ఆకర్షణగా నిలుస్తుంది. పక్కభాగాల్లోని అందమైన బాడీ ప్యానెల్స్‌తో ఈ సీట్ డిజైన్ చక్కగా కలిసిపోయింది. వెనుకవైపు ఆధునిక రూపంలో ఎల్‌ఈడీ టెయిల్ ల్యాంప్‌ను అమర్చారు.
ఈ ఎలక్ట్రిక్ స్కూటర్‌లో పీఎంఎస్ఎం (PMSM) ఎలక్ట్రిక్ మోటార్‌ను ఉపయోగించారు. ఇది గరిష్ఠంగా 5 కిలోవాట్ల పవర్‌ను ఉత్పత్తి చేస్తుంది. రైడర్ల అవసరాలకు అనుగుణంగా ఇందులో మూడు రైడింగ్ మోడ్‌లను అందించారు. అవి ఎకో, నార్మల్, స్పోర్ట్ మోడ్‌లు.
ఈ స్కూటర్ గరిష్ఠ వేగం గంటకు 90 కిలోమీటర్లుగా కంపెనీ పేర్కొంది. ఇందులో 4.5 కిలోవాట్ అవర్ బ్యాటరీ ప్యాక్‌ను అమర్చారు. ఒక్కసారి పూర్తిగా ఛార్జ్ చేస్తే గరిష్ఠంగా 119 కిలోమీటర్ల వరకు ప్రయాణించవచ్చని వెల్లడించింది. బ్యాటరీని పూర్తిగా ఛార్జ్ చేయడానికి ఐదు గంటల సమయం పడుతుంది.
ప్రస్తుతం భారత్‌లో బజాజ్ చేతక్, టీవీఎస్ ఐక్యూబ్, విడా వీ2, ఏథర్ వంటి ఎలక్ట్రిక్ స్కూటర్లకు మంచి ఆదరణ లభిస్తోంది. ఈ నేపథ్యంలో లాంబ్రెట్టా ఎలెట్రా ఎస్ భారత మార్కెట్లోకి వస్తే రెట్రో డిజైన్‌ను ఇష్టపడే వినియోగదారులను ఆకర్షించే అవకాశం ఉంది. అయితే ఈ స్కూటర్ భారతదేశంలో ఎప్పుడు విడుదలవుతుంది? ధర ఎంత ఉంటుంది? వంటి వివరాలపై ప్రస్తుతానికి స్పష్టత లేదు. భారత మార్కెట్లోకి వస్తే ఎలక్ట్రిక్ స్కూటర్ విభాగంలో లాంబ్రెట్టా ఎలాంటి పోటీ ఇస్తుందో చూడాలి.