వరంగల్–ఖమ్మం–నల్గొండ పట్టభద్రుల ఎమ్మెల్సీ ఎన్నికలకు సంబంధించి ఓటరు నమోదు ప్రక్రియను పకడ్బందీగా నిర్వహించాలని వరంగల్ జిల్లా కాంగ్రెస్ పార్టీ అధ్యక్షుడు మహమ్మద్ అయూబ్.. పార్టీ నాయకులు, కార్యకర్తలకు పిలుపునిచ్చారు. అర్హులైన ప్రతి పట్టభద్రుడికి ఓటు హక్కు కల్పించేలా కాంగ్రెస్ శ్రేణులన్నీ సమన్వయంతో పనిచేయాలని సూచించారు. ఓటరు నమోదు విషయంలో నిర్లక్ష్యం చేయకుండా ప్రత్యేక శ్రద్ధ చూపించాలని స్పష్టం చేశారు.
వరంగల్ జిల్లా కాంగ్రెస్ పార్టీ కార్యాలయంలో పట్టభద్రుల ఎమ్మెల్సీ ఎన్నికల ఓటరు నమోదు ప్రక్రియపై మహమ్మద్ అయూబ్ అధ్యక్షతన సమావేశం నిర్వహించారు. ఈ సందర్భంగా ఆయన మాట్లాడుతూ.. పట్టభద్రుల ఎమ్మెల్సీ ఎన్నికల్లో ఓటరు నమోదు అత్యంత కీలకమైన అంశమని పేర్కొన్నారు. అర్హత కలిగిన ప్రతి ఒక్కరూ ఓటరుగా నమోదు చేసుకునేలా పార్టీ నాయకులు చొరవ తీసుకోవాలని కోరారు. ఎన్నికల్లో పట్టభద్రుల ఓటు హక్కు కీలక పాత్ర పోషిస్తుందని ఈ నేపథ్యంలో అర్హులైన వారెవరూ నమోదు ప్రక్రియకు దూరం కాకుండా చూడాల్సిన బాధ్యత పార్టీ శ్రేణులపై ఉందని అన్నారు.
ముఖ్యంగా మండల, డివిజన్ స్థాయిలో ఓటరు నమోదు ప్రక్రియపై విస్తృతంగా అవగాహన కల్పించాలని అయూబ్ సూచించారు. పట్టభద్రుల ఎమ్మెల్సీ ఓటరుగా నమోదు చేసుకోవడానికి అవసరమైన అర్హతలు, దరఖాస్తు విధానం, ఇతర వివరాలను అర్హులకు తెలియజేయాలని చెప్పారు. ప్రతి మండలం, డివిజన్ పరిధిలోని పట్టభద్రులను గుర్తించి, వారిని ఓటరుగా నమోదు చేసుకునేలా ప్రోత్సహించాలని సూచించారు. ఇందుకోసం స్థానిక నాయకులు, కార్యకర్తలు సమన్వయంతో కార్యాచరణ రూపొందించుకుని ముందుకు సాగాలని తెలిపారు.
పార్టీకి చెందిన మండల, డివిజన్ అధ్యక్షులు తమ పరిధిలో ఓటరు నమోదు కార్యక్రమాన్ని బాధ్యతగా తీసుకోవాలని కోరారు. పట్టభద్రులను నేరుగా కలిసి నమోదు ప్రక్రియపై అవగాహన కల్పించాలని, అవసరమైన సహకారం అందించాలని సూచించారు. ప్రతి అర్హుడికి ఓటు హక్కు కల్పించడమే లక్ష్యంగా కాంగ్రెస్ శ్రేణులంతా క్షేత్రస్థాయిలో చురుకుగా పనిచేయాలని పిలుపునిచ్చారు. అందరి సమష్టి కృషితో ఓటరు నమోదు కార్యక్రమాన్ని విజయవంతం చేయాలని ఆకాంక్షించారు.
ఈ సమావేశంలో మండల అధ్యక్షులు పొశాల వెంకన్న, ఇస్లావత్ సావిత్రి, దాడి శివ, ఇండ్ల రవికుమార్, డివిజన్ అధ్యక్షులు జన్ను అరుణాకర్, సయ్యద్ ఇంతియాజ్, మాడుగుల రాజ్ కుమార్, అశోక్, మహమ్మద్ జానీ, పసునూరి శ్రవణ్ , మన్నె బాబురావు, ఎల్గొండ ప్రవీణ్, గోదాసి చిన్న, కిన్నెర రవి, సన్నీ, దస్తగిరి తదితరులు హాజరయ్యారు.