కరీంనగర్ జిల్లాలో విషాదకర ఘటన చోటుచేసుకుంది. ప్రేమ వ్యవహారంలో మోసపోయానని భావించి తీవ్ర మనస్తాపానికి గురైన అఖిల అనే యువతి పురుగుల మందు తాగి ఆత్మహత్యాయత్నానికి పాల్పడగా, ఆస్పత్రిలో చికిత్స పొందుతూ మృతి చెందింది. సైదాపూర్ మండలం ఎలబోతారం గ్రామానికి చెందిన అఖిల మృతితో కుటుంబ సభ్యులు కన్నీరుమున్నీరవుతున్నారు. ఈ ఘటన గ్రామంలో విషాదాన్ని నింపింది.
పోలీసులు తెలిపిన వివరాల ప్రకారం, అదే గ్రామానికి చెందిన అక్షయ్ అనే యువకుడితో అఖిలకు పరిచయం ఏర్పడగా, అది ప్రేమ వ్యవహారానికి దారితీసినట్లు సమాచారం. అయితే, ప్రేమ పేరుతో అక్షయ్ తనను మోసం చేశాడని అఖిల భావించినట్లు ప్రాథమిక సమాచారం. ఈ పరిణామాలతో తీవ్ర మనస్తాపానికి గురైన ఆమె పురుగుల మందు తాగినట్లు తెలుస్తోంది. గమనించిన కుటుంబ సభ్యులు ఆమెను కరీంనగర్‌లోని ఓ ప్రైవేట్ ఆస్పత్రికి తరలించి చికిత్స అందించారు. అయినప్పటికీ పరిస్థితి విషమించడంతో అఖిల ప్రాణాలు కోల్పోయింది. ఈ ఘటనపై అఖిల బంధువులు పోలీసులకు ఫిర్యాదు చేయగా, కేసు నమోదు చేసి దర్యాప్తు ప్రారంభించారు. అక్షయ్‌పై వచ్చిన ఆరోపణలు, యువతి ఆత్మహత్యాయత్నానికి దారితీసిన పరిస్థితులు, ఘటనకు సంబంధించిన ఇతర వివరాలపై పోలీసులు విచారణ చేపట్టారు. దర్యాప్తు పూర్తయిన తర్వాతే పూర్తి వాస్తవాలు వెల్లడయ్యే అవకాశం ఉంది.