Hyderabad: హైదరాబాద్ నగరంలోని కూకట్‌పల్లి పోలీస్ స్టేషన్ పరిధిలో దారుణ ఘటన చోటుచేసుకుంది. కుటుంబ కలహాలు చివరకు ఓ మహిళ ప్రాణాలను బలిగొన్నాయి. భార్యాభర్తల మధ్య కొంతకాలంగా కొనసాగుతున్న విభేదాలు తీవ్ర రూపం దాల్చడంతో భర్త తన భార్యను అత్యంత క్రూరంగా హత్య చేసిన ఘటన స్థానికంగా కలకలం రేపింది. ఈ ఘటనతో కుటుంబ సభ్యులు, స్థానికులు తీవ్ర దిగ్భ్రాంతికి గురయ్యారు.
పోలీసులు వెల్లడించిన వివరాల ప్రకారం.. బోరబండ ప్రాంతానికి చెందిన షేక్ రహీం (32)కు సుమేరా బేగం (23)తో 2024లో వివాహం జరిగింది. ఈ దంపతులకు ప్రస్తుతం 20 నెలల వయస్సు గల కుమారుడు ఉన్నాడు. వీరు కైత్లాపూర్‌లోని ఇందిరమ్మ కాలనీలో నివాసం ఉంటున్నారు. వివాహం జరిగిన కొంతకాలం తర్వాత నుంచే ఇద్దరి మధ్య తరచూ గొడవలు జరుగుతున్నట్లు సమాచారం. కుటుంబ విభేదాలు మరింత పెరగడంతో రెండు నెలల క్రితం ఏప్రిల్ నెలలో సుమేరా బేగం తన భర్త షేక్ రహీంపై గృహహింస కేసు నమోదు చేసింది. అప్పట్లో పోలీసులు కేసు నమోదు చేసి ఇద్దరికీ కౌన్సెలింగ్ నిర్వహించినట్లు తెలిసింది.
అయితే పరిస్థితుల్లో ఎలాంటి మార్పు రాకపోవడంతో గురువారం ఉదయం మరోసారి భార్యాభర్తల మధ్య తీవ్ర వాగ్వాదం చోటుచేసుకుంది. మాటామాటా పెరగడంతో ఆగ్రహానికి లోనైన షేక్ రహీం ఇంట్లో ఉన్న కూరగాయలు కోసే కత్తితో భార్య సుమేరా బేగంపై దాడి చేశాడు. అనంతరం ఆమె గొంతు కోయడంతో తీవ్ర రక్తస్రావానికి గురైన సుమేరా బేగం అక్కడికక్కడే మృతి చెందినట్లు సమాచారం. ఘటనపై సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిస్థితిని పరిశీలించారు. మృతదేహాన్ని స్వాధీనం చేసుకుని పోస్టుమార్టం నిమిత్తం గాంధీ ఆసుపత్రికి తరలించారు.
ఘటన అనంతరం నిందితుడు షేక్ రహీంను పోలీసులు అదుపులోకి తీసుకుని విచారిస్తున్నారు. కుటుంబ కలహాలే ఈ హత్యకు కారణమా లేదా ఇతర అంశాలేమైనా ఉన్నాయా అనే కోణంలో దర్యాప్తు కొనసాగిస్తున్నారు. చిన్నారి కుమారుడిని అనాథగా మార్చిన ఈ విషాద ఘటన స్థానికంగా తీవ్ర చర్చనీయాంశంగా మారింది. కేసుకు సంబంధించిన పూర్తి వివరాలను వెలికితీసేందుకు పోలీసులు ఆధారాలు సేకరిస్తున్నారు.
ALSO READ: NFHS Survey: ఏ రాష్ట్రాల్లో ఎక్కువ మంది మహిళలు మద్యం తాగుతారు..?