Assam: అస్సాంలోని ప్రసిద్ధ కామాఖ్య దేవాలయాన్ని సందర్శించేందుకు సిద్ధమవుతున్న భక్తులకు ఆలయ యాజమాన్యం కీలక సూచనలు జారీ చేసింది. భక్తుల రద్దీని సమర్థవంతంగా నియంత్రించడం, దర్శన ప్రక్రియను మరింత పారదర్శకంగా మార్చడం లక్ష్యంగా ప్రత్యేక దర్శనం టిక్కెట్ల జారీ విధానంలో పెద్ద మార్పులు చేపట్టింది. ఇప్పటి వరకు కొనసాగుతున్న ఆఫ్‌లైన్ టిక్కెట్ బుకింగ్ వ్యవస్థను పూర్తిగా రద్దు చేస్తూ, ఇకపై ప్రత్యేక దర్శనం టిక్కెట్లను కేవలం ఆన్‌లైన్ ద్వారానే అందుబాటులో ఉంచనున్నట్లు ప్రకటించింది. దీంతో ఆలయాన్ని సందర్శించాలనుకునే భక్తులు ముందుగానే తమ దర్శన సమయాన్ని ఆన్‌లైన్‌లో నమోదు చేసుకోవాల్సి ఉంటుంది.
ఆలయ వర్గాల సమాచారం ప్రకారం.. జూన్ 15 నుంచి ఈ కొత్త విధానం అమల్లోకి రానుంది. ఆ తేదీ తర్వాత టిక్కెట్ కౌంటర్ల వద్ద ప్రత్యేక దర్శనం టిక్కెట్ల జారీ పూర్తిగా నిలిపివేయబడుతుంది. భక్తులు నేరుగా ఆలయానికి వెళ్లి టిక్కెట్లు పొందే అవకాశం ఉండదు. ప్రతి రోజు పెరుగుతున్న భక్తుల రద్దీ, కౌంటర్ల వద్ద ఏర్పడుతున్న భారీ క్యూలు, ఎక్కువసేపు వేచి ఉండాల్సిన పరిస్థితులను దృష్టిలో పెట్టుకుని ఈ నిర్ణయం తీసుకున్నట్లు ఆలయ అధికారులు వెల్లడించారు. ఈ కొత్త విధానం ద్వారా దర్శన ప్రక్రియ మరింత సులభతరం కావడంతో పాటు భక్తులకు సమయం కూడా ఆదా అవుతుందని భావిస్తున్నారు.
ప్రత్యేక దర్శనం టిక్కెట్ల కోసం రూపొందించిన నూతన ఆన్‌లైన్ బుకింగ్ వ్యవస్థ జూన్ 15 సాయంత్రం 6:00 గంటల నుంచి అందుబాటులోకి రానుంది. భక్తులు అధికారిక వెబ్‌సైట్‌లోకి వెళ్లి తమకు అనుకూలమైన తేదీ, సమయాన్ని ఎంపిక చేసుకుని టిక్కెట్లు బుక్ చేసుకోవచ్చు. బుకింగ్ విజయవంతంగా పూర్తయిన తర్వాత డిజిటల్ పాస్ జారీ చేయబడుతుంది. దర్శనానికి వచ్చే వారు ముందుగానే తమ స్లాట్‌లను రిజర్వ్ చేసుకోవాలని ఆలయ యాజమాన్యం సూచించింది. దీంతో చివరి నిమిషంలో ఇబ్బందులు ఎదురుకాకుండా ఉంటాయని పేర్కొంది.
అస్సాం రాష్ట్రంలోని గౌహతి నగరంలో నీలాచల్ కొండపై వెలసిన కామాఖ్య దేవాలయం దేశంలోని అత్యంత ప్రసిద్ధ శక్తి పీఠాలలో ఒకటిగా గుర్తింపు పొందింది. ప్రతి సంవత్సరం లక్షలాది మంది భక్తులు ఈ ఆలయాన్ని సందర్శించి అమ్మవారిని దర్శించుకుంటారు. ముఖ్యంగా అంబుబాచి మేళా సమయంలో దేశం నలుమూలల నుంచి భారీ సంఖ్యలో భక్తులు తరలివస్తుంటారు. ఈ ఏడాది కూడా జూన్ నెలాఖరులో ప్రారంభం కానున్న అంబుబాచి మేళా సందర్భంగా భక్తుల రద్దీ మరింత పెరిగే అవకాశం ఉండటంతో దర్శన నిర్వహణను సులభతరం చేసేందుకు ఆన్‌లైన్ బుకింగ్ విధానాన్ని తప్పనిసరి చేస్తున్నట్లు అధికారులు తెలిపారు.
అయితే ఈ ఆన్‌లైన్ ప్రత్యేక దర్శనం సౌకర్యం సాధారణ భక్తులు, యాత్రికుల కోసం మాత్రమే అందుబాటులో ఉంటుందని ఆలయ నిర్వహణ కమిటీ స్పష్టం చేసింది. ఆలయ సిబ్బంది, నీలాచల్ కొండ ప్రాంత నివాసితులు, పండాలు లేదా ఆలయానికి సంబంధించిన ఇతర వర్గాల పేర్లతో జరిగే బుకింగ్‌లు చెల్లవని పేర్కొంది. అలాంటి రిజర్వేషన్లు గుర్తించిన వెంటనే రద్దు చేయబడతాయని హెచ్చరించింది. అందువల్ల కామాఖ్య దేవాలయ దర్శనానికి వెళ్లాలని భావిస్తున్న భక్తులు ఇకపై ఆఫ్‌లైన్ కౌంటర్లపై ఆధారపడకుండా ముందుగానే ఆన్‌లైన్‌లో టిక్కెట్లు బుక్ చేసుకుని ప్రయాణ ప్రణాళికలు సిద్ధం చేసుకోవడం ఉత్తమమని సూచిస్తున్నారు.
ALSO READ: Laundry Tips: ఈ బట్టలు వాషింగ్ మెషిన్‌లో వేస్తున్నారా?.. అస్సలు వేయకండి