Andhra Pradesh: ఆంధ్రప్రదేశ్‌లో చదువుతున్న విద్యార్థులు, వారి తల్లిదండ్రులకు రాష్ట్ర ప్రభుత్వం శుభవార్త అందించింది. ఎంతోకాలంగా ఎదురుచూస్తున్న ‘తల్లికి వందనం’ పథకం నిధుల విడుదలపై స్పష్టత వచ్చింది. కొత్త విద్యా సంవత్సరం ప్రారంభం కావడంతో పుస్తకాలు, యూనిఫాంలు, బ్యాగులు, ఫీజులు తదితర ఖర్చుల భారం పెరుగుతున్న నేపథ్యంలో ఈ ఆర్థిక సాయం ఎప్పుడు ఖాతాల్లో జమ అవుతుందా అని లక్షలాది కుటుంబాలు ఎదురుచూస్తున్నాయి. ఈ నేపథ్యంలో ముఖ్యమంత్రి నారా చంద్రబాబు నాయుడు అధ్యక్షతన గురువారం జరిగిన కీలక మంత్రివర్గ సమావేశంలో ‘తల్లికి వందనం’ పథకం నిధుల విడుదలపై విస్తృతంగా చర్చ జరిగింది. లబ్ధిదారుల ఖాతాల్లో నిధులను ఎప్పుడు జమ చేయాలనే అంశంపై నిర్ణయం తీసుకున్నట్లు సమాచారం.
మంత్రివర్గ సమావేశంలో తీసుకున్న నిర్ణయం ప్రకారం, ఈ విద్యా సంవత్సరంలో నిర్వహించనున్న తొలి భారీ తల్లిదండ్రులు-ఉపాధ్యాయుల సమావేశానికి ముందే ‘తల్లికి వందనం’ నిధులను విడుదల చేయాలని ప్రభుత్వం నిర్ణయించింది. విద్యా సంవత్సరం ప్రారంభంలోనే ఆర్థిక సాయం అందించడం ద్వారా తల్లిదండ్రులపై పడే ఖర్చుల భారం కొంత మేర తగ్గుతుందని ప్రభుత్వం భావిస్తోంది. ముఖ్యంగా పాఠశాలలు ప్రారంభమైన వెంటనే విద్యార్థులకు అవసరమైన పుస్తకాలు, బ్యాగులు, యూనిఫాంలు కొనుగోలు చేయాల్సి ఉండటంతో పాటు ఫీజులు కూడా చెల్లించాల్సి ఉంటుంది. ఈ అవసరాలను దృష్టిలో ఉంచుకుని నిధులను త్వరగా విడుదల చేయాలని ప్రభుత్వం నిర్ణయించినట్లు తెలుస్తోంది.
‘తల్లికి వందనం’ పథకం కింద ప్రతి విద్యార్థికి సంవత్సరానికి రూ.15,000 ఆర్థిక సాయం అందించనున్నారు. అయితే పాఠశాలల నిర్వహణ వ్యయాల కోసం రూ.2,000 మినహాయించి మిగిలిన రూ.13,000ను విద్యార్థుల తల్లిదండ్రుల బ్యాంకు ఖాతాల్లో నేరుగా జమ చేయనున్నారు. ఒకటో తరగతి నుంచి ఇంటర్ వరకు చదువుతున్న విద్యార్థులకు ఈ పథకం వర్తిస్తుంది. ఈ పథకం ద్వారా విద్యను ప్రోత్సహించడంతో పాటు ఆర్థికంగా వెనుకబడిన కుటుంబాలకు చేయూత అందించడమే ప్రభుత్వ లక్ష్యంగా ఉంది.
వేసవి సెలవుల అనంతరం ఆంధ్రప్రదేశ్‌లో పాఠశాలలు ఈ నెల 12 నుంచి తిరిగి ప్రారంభం కానుండగా, జూనియర్ కళాశాలలు ఈ నెల 6 నుంచే తెరుచుకోనున్నాయి. ఈ నేపథ్యంలో విద్యా సంస్థలు ప్రారంభమైన కొద్ది రోజుల వ్యవధిలోనే ‘తల్లికి వందనం’ నిధులు లబ్ధిదారుల ఖాతాల్లో జమ అయ్యే అవకాశం ఉందని అధికార వర్గాలు సూచిస్తున్నాయి. ఈ నెలలోనే లేదా అత్యధికంగా వచ్చే నెలలో నిధుల విడుదల జరిగే అవకాశముండటంతో విద్యార్థులు, తల్లిదండ్రులు ఆసక్తిగా ఎదురుచూస్తున్నారు.
ALSO READ: Ram Charan: ‘పెద్ది’ ఊచకోత.. ఫస్ట్ డే కలెక్షన్స్ ఎంతంటే..?