Snake’s tongue: మన చుట్టూ కనిపించే జీవుల్లో పాములు అత్యంత ఆసక్తికరమైన జీవులుగా గుర్తింపు పొందాయి. పాములను చూసిన వెంటనే చాలా మంది భయంతో దూరంగా వెళ్లిపోతారు. వాటి విషపూరిత కాటు కారణంగా ప్రమాదకర జీవులుగా భావిస్తారు. అయితే వాస్తవానికి చాలా పాములు మనుషులపై ఉద్దేశపూర్వకంగా దాడి చేయవు. తమకు ప్రమాదం ఏర్పడిందని భావించినప్పుడు లేదా ఆత్మరక్షణ కోసం మాత్రమే అవి స్పందిస్తాయి. మిగతా సమయాల్లో తమ దారిన తాము వెళ్లిపోతుంటాయి. అయితే పాములను జాగ్రత్తగా గమనిస్తే ఒక ఆసక్తికరమైన విషయం కనిపిస్తుంది. అవి తరచూ తమ నాలుకను బయటకు తీసి మళ్లీ లోపలికి తీసుకుంటూ ఉంటాయి. చాలామంది దీనిని కోపం లేదా దాడి చేయడానికి సంకేతంగా భావిస్తారు. కానీ దీని వెనుక ఒక అద్భుతమైన శాస్త్రీయ రహస్యం దాగి ఉంది.
ఇతర జంతువులతో పోలిస్తే పాముల శరీర నిర్మాణం చాలా ప్రత్యేకంగా ఉంటుంది. మనుషులు లేదా ఇతర జంతువుల మాదిరిగా పరిసరాలను అంచనా వేయడానికి అవి ప్రధానంగా నాలుకపై ఆధారపడతాయి. పాముల నాలుక కేవలం ఆహారం తినేందుకు ఉపయోగపడే అవయవం మాత్రమే కాదు, అది ఒక ప్రత్యేకమైన సెన్సార్‌లా పనిచేస్తుంది. తమ చుట్టూ ఉన్న వాతావరణం, శత్రువులు, ఆహారం లేదా ఇతర జీవుల ఉనికిని గుర్తించేందుకు పాములు నిరంతరం తమ నాలుకను ఉపయోగిస్తుంటాయి.
పాము నాలుకను బయటకు చాచినప్పుడు గాలిలో తేలియాడే సూక్ష్మ రసాయన కణాలు దానికి అంటుకుంటాయి. ఆ తర్వాత పాము నాలుకను మళ్లీ నోటిలోకి తీసుకున్నప్పుడు ఆ కణాలు నోటి పైభాగంలో ఉండే ప్రత్యేక అవయవానికి చేరుతాయి. ఈ అవయవాన్ని శాస్త్రవేత్తలు ‘జాకబ్సన్ అవయవం’ లేదా ‘వోమెరోనాసల్ అవయవం’ అని పిలుస్తారు. ఈ వ్యవస్థ గాలిలోని రసాయన సంకేతాలను విశ్లేషించి మెదడుకు సమాచారం పంపిస్తుంది. ఆ సమాచారాన్ని ఆధారంగా చేసుకుని పాము తన చుట్టూ ఏమి జరుగుతోందో అంచనా వేస్తుంది.
ఈ ప్రత్యేక సామర్థ్యం వల్లే పాములు తమ ఆహారాన్ని గుర్తించగలుగుతాయి. అలాగే సమీపంలో శత్రువులు ఉన్నాయా లేదా అనే విషయాన్ని కూడా తెలుసుకుంటాయి. కొన్ని సందర్భాల్లో వందల మీటర్ల దూరంలో ఉన్న జీవుల వాసనను కూడా ఈ వ్యవస్థ ద్వారా గుర్తించగల సామర్థ్యం పాములకు ఉంటుంది. అందువల్ల అవి ప్రమాదాలను ముందుగానే పసిగట్టి తగిన చర్యలు తీసుకోగలుగుతాయి.
పాముల జీవితంలో నాలుక పాత్ర అత్యంత కీలకమైనది. ఒకవేళ పాము తన నాలుకను ఉపయోగించలేకపోతే పరిసరాల గురించి సరైన సమాచారాన్ని సేకరించలేను. ఆహారాన్ని వెతకడం, శత్రువులను గుర్తించడం, ప్రయాణ దిశను అంచనా వేయడం వంటి అనేక పనులు కష్టంగా మారతాయి. అందుకే పాములు నిరంతరం తమ నాలుకను బయటకు తీసి లోపలికి తీసుకుంటూ కనిపిస్తాయి. ఇది కోపానికి లేదా దాడికి సంకేతం కాదు. ప్రకృతి వాటికి ప్రసాదించిన అత్యంత అద్భుతమైన గుర్తింపు వ్యవస్థలో భాగమని శాస్త్రవేత్తలు చెబుతున్నారు.
పాముల ప్రవర్తనను అర్థం చేసుకుంటే వాటి గురించి ఉన్న అనేక అపోహలు తొలగిపోతాయి. నాలుకను బయటకు చాచడం వెనుక ఉన్న ఈ శాస్త్రీయ కారణం తెలుసుకుంటే ప్రకృతిలో ప్రతి జీవి ఎంత అద్భుతంగా రూపొందిందో మరింత స్పష్టంగా అర్థమవుతుంది.
ALSO READ: Wildlife Facts: ఎవరి బలం వారికి ప్రత్యేకం.. మరి గెలుపు ఎవరి వశం..?