దేశంలో అమాయక యువకులను లక్ష్యంగా చేసుకుని పెళ్లి పేరుతో మోసాలకు పాల్పడుతున్న ఒక భారీ నేరజాలం వెలుగులోకి రావడం తీవ్ర ఆందోళన కలిగిస్తోంది. మహారాష్ట్ర రాష్ట్రంలోని బీడ్ జిల్లా కేంద్రంగా పనిచేస్తున్న ఈ ముఠా, వివాహం పేరుతో నమ్మించి లక్షల రూపాయలు దోచుకుని పరారవుతున్న ఘటనలు వరుసగా బయటపడుతున్నాయి. తాజాగా ఒక మహిళ ఏకంగా 9 మందిని వివాహం చేసుకుని, ప్రతి సారి నగదు, బంగారు ఆభరణాలతో పారిపోయిన విషయం బయటపడటంతో ఈ వ్యవహారం పెద్ద సంచలనంగా మారింది. ఈ ఘటనపై పోలీసులు దర్యాప్తు ప్రారంభించగా, మరిన్ని షాకింగ్ వివరాలు వెలుగులోకి వస్తున్నాయి.
పోలీసుల వివరాల ప్రకారం.. బాధితుడు యోగేష్ షిండే ఫిర్యాదు మేరకు ఈ మోసపు గుట్టు రట్టు అయింది. మధ్యవర్తుల ద్వారా పెళ్లి కుదిరిందని నమ్మిన యోగేష్, వివాహ ఏర్పాట్ల కోసం సుమారు రూ.25 లక్షలు చెల్లించాడు. పెళ్లి జరిగిన కొద్ది రోజులకే వధువు, ఆమెతో కలిసి పనిచేసిన ముఠా సభ్యులు ఇంట్లోని నగదు, నగలను తీసుకుని అదృశ్యమయ్యారు. అనుమానం వచ్చి ఆరా తీయగా, ఆ మహిళ ఇప్పటికే 8 మందితో ఇలాగే పెళ్లిళ్లు చేసి మోసాలకు పాల్పడిందని తెలిసి బాధితుడు షాక్‌కు గురయ్యాడు. వెంటనే పోలీసులను ఆశ్రయించి న్యాయం చేయాలని కోరాడు.
ఈ ముఠా ప్రధానంగా గ్రామీణ ప్రాంతాల్లో పెళ్లి కుదరని యువకులను లక్ష్యంగా చేసుకుంటున్నట్లు విచారణలో తేలింది. ఏజెంట్ల ద్వారా ముందుగా బాధితులను గుర్తించి, అమ్మాయి కుటుంబం పేదదని, సహాయం చేయాలని భావోద్వేగంగా ఒప్పించి భారీ మొత్తంలో డబ్బులు వసూలు చేస్తారు. వివాహం పూర్తయిన కొద్దిరోజుల్లోనే ముందస్తు ప్రణాళిక ప్రకారం నగదు, నగలతో వధువు పారిపోతుంది. ఇలా అనేక మంది యువకులు ఈ మోసానికి గురయ్యారని పోలీసులు అనుమానిస్తున్నారు.
ఈ కేసు చక్లాంబా పోలీస్ స్టేషన్ పరిధిలో నమోదు కాగా, జిల్లా పోలీసు ఉన్నతాధికారుల పర్యవేక్షణలో దర్యాప్తు వేగంగా కొనసాగుతోంది. పరువు పోతుందన్న భయంతో ఇంకా పలువురు బాధితులు ముందుకు రావడంలేదని అధికారులు చెబుతున్నారు. ఈ నేపథ్యంలో ప్రజలు అపరిచిత సంబంధాల విషయంలో జాగ్రత్తగా ఉండాలని, నమ్మకమైన వనరుల ద్వారానే వివాహాలు జరపాలని పోలీసులు హెచ్చరిస్తున్నారు.
ఈ ఘటన సమాజంలో పెళ్లి పేరుతో జరుగుతున్న మోసాలపై మరోసారి హెచ్చరికలా మారింది. సంబంధాల విషయంలో అప్రమత్తత లేకపోతే ఎంత పెద్ద నష్టాలు చవిచూడాల్సి వస్తుందో ఈ సంఘటన స్పష్టంగా చూపిస్తోంది.
ASLO READ: Technology: పబ్లిక్ వైఫై వాడటం సేఫేనా..?