Business: గత వారం రోజులుగా బంగారం, వెండి ధరల్లో కనిపిస్తున్న మార్పులు మార్కెట్‌లో ఆసక్తికర పరిస్థితులను సృష్టిస్తున్నాయి. సాధారణంగా ఈ రెండు లోహాలు ఒకే దిశలో కదులుతాయని భావిస్తారు కానీ ప్రస్తుతం పూర్తిగా భిన్నమైన ధోరణి కనిపిస్తోంది. బంగారం ధరలు తగ్గుముఖం పడుతుండగా, వెండి ధరలు మాత్రం గణనీయంగా పెరుగుతున్నాయి. ఈ వ్యత్యాసం వెనుక డిమాండ్ లో ఉన్న మార్పులే ప్రధాన కారణమని నిపుణులు విశ్లేషిస్తున్నారు. ముఖ్యంగా వెండి విషయంలో ఆభరణాలకే పరిమితం కాకుండా పారిశ్రామిక వినియోగం పెరగడం ధరల పెరుగుదలకు దోహదం చేస్తోంది. ఎలక్ట్రిక్ వాహనాల తయారీ, డేటా కేంద్రాల నిర్మాణం వంటి రంగాల్లో వెండి వినియోగం పెరగడం వల్ల దీనికి డిమాండ్ గణనీయంగా పెరిగినట్లు మార్కెట్ వర్గాలు చెబుతున్నాయి.
వారం ప్రారంభంలో 10 గ్రాముల 24 క్యారెట్ల బంగారం ధర రూ.1,53,070 వద్ద ఉండగా, మే 2 నాటికి అది రూ.1,51,810కి పడిపోయింది. అంటే కేవలం 7 రోజుల్లోనే రూ.1260 మేర తగ్గుదల నమోదైంది. ముఖ్యంగా ఏప్రిల్ 29న బంగారం ధర ఒక్కసారిగా రూ.1.50 లక్షల స్థాయి కంటే దిగువకు జారిపోవడం మార్కెట్‌లో చర్చనీయాంశంగా మారింది. ఆ తర్వాత స్వల్పంగా కోలుకున్నప్పటికీ మొత్తం మీద బంగారం తగ్గుదల దిశలోనే కొనసాగింది. ఇదే సమయంలో వెండి ధరలు పూర్తిగా భిన్నంగా ప్రవర్తించాయి. ఏప్రిల్ 26న కిలో వెండి ధర రూ.2,46,110గా ఉండగా, మే 2 నాటికి అది రూ.2,51,170కి చేరింది. అంటే కేవలం ఒక వారంలోనే రూ.5060 పెరుగుదల నమోదైంది. ఇదే కాకుండా ఈ ఏడాది జనవరిలో ఈ రెండు లోహాలు చరిత్రాత్మక గరిష్ఠ స్థాయులను కూడా తాకాయి. అప్పట్లో 10 గ్రాముల బంగారం ధర రూ.1.80 లక్షల వరకు చేరగా, కిలో వెండి ధర రూ.4 లక్షలు దాటడం గమనార్హం.
బంగారం ధరల పతనానికి అంతర్జాతీయ పరిణామాలే ప్రధాన కారణంగా కనిపిస్తున్నాయి. ప్రపంచవ్యాప్తంగా నెలకొన్న అనిశ్చిత పరిస్థితులు, అమెరికా కేంద్ర బ్యాంక్ వడ్డీ రేట్లపై ఉన్న సందిగ్ధతలు బంగారం మార్కెట్‌పై ప్రభావం చూపుతున్నాయి. గత వారంలో బంగారం ధరలు 0.81 శాతం మేర తగ్గినట్లు అంచనాలు సూచిస్తున్నాయి. అమెరికా-ఇరాన్ మధ్య చర్చల్లో స్పష్టత లేకపోవడం, వడ్డీ రేట్ల కోతలపై అంచనాలు తగ్గిపోవడం కూడా పసిడిపై ఒత్తిడిని పెంచాయి. అదేవిధంగా ముడి చమురు ధరలు పెరగడం, డాలర్ బలపడటం వంటి అంశాలు కూడా బంగారం ధరలను కిందికి లాగుతున్నాయి. అంతేకాకుండా అమెరికా-ఇరాన్ ఉద్రిక్తతలు ప్రారంభమైన తర్వాత నుంచి బంగారం ధరలు సుమారు 14 శాతం వరకు పడిపోయినట్లు విశ్లేషణలు చెబుతున్నాయి. హర్ముజ్ జలసంధి పరిణామాలు, చమురు సరఫరాలో అంతరాయాల భయం, భౌగోళిక రాజకీయ ఉద్రిక్తతలు కొనసాగుతున్న నేపథ్యంలో బంగారం ధరలు ఇంకా హెచ్చుతగ్గులకు లోనయ్యే అవకాశం ఉందని నిపుణులు హెచ్చరిస్తున్నారు.
ALSO READ: Hyderabad: దారుణం.. కారు బానెట్‌పై 2 కిలోమీటర్ల దూరం ఈడ్చుకెళ్లిన డ్రైవర్