Uttar Pradesh: ఉత్తరప్రదేశ్ రాష్ట్రంలో విషాదాన్ని మిగిల్చిన ఘోర రోడ్డు ప్రమాదం చోటుచేసుకుంది. మౌ జిల్లా పరిధిలో శనివారం ఏప్రిల్ 25 తెల్లవారుజామున జరిగిన ఈ ప్రమాదంలో ఐదుగురు అక్కడికక్కడే ప్రాణాలు కోల్పోయారు. దోరిఘాట్ ప్రాంతంలోని బర్సాత్‌పూర్-అహిరానీ జాతీయ రహదారిపై అతివేగంగా ప్రయాణిస్తున్న ఒక స్కార్పియో వాహనం అదుపు కోల్పోయి ముందుగా డివైడర్‌ను ఢీకొట్టి, ఆ ప్రభావంతో అవతలి లేన్‌లోకి దూసుకెళ్లింది. అదే సమయంలో ఎదురుగా వస్తున్న భారీ ట్రైలర్‌ను బలంగా ఢీకొట్టడంతో ఈ దుర్ఘటన సంభవించింది. తెల్లవారుజామున సుమారు 3 గంటల సమయంలో జరిగిన ఈ ప్రమాదంలో స్కార్పియో వాహనం పూర్తిగా నుజ్జునుజ్జు కాగా, అందులో ప్రయాణిస్తున్న 5 మంది ప్రాణాలు కోల్పోయారు. ప్రమాద తీవ్రత అంతగా ఉండటంతో వాహనంలో ఉన్న పెంపుడు కుక్క కూడా మృతిచెందడం గమనార్హం.
ప్రమాద సమాచారం అందుకున్న వెంటనే దోరిఘాట్ పోలీసులు ఘటనాస్థలానికి చేరుకుని స్థానికుల సహాయంతో మృతదేహాలను బయటకు తీశారు. అనంతరం పోస్ట్‌మార్టం కోసం వాటిని జిల్లా ఆసుపత్రికి తరలించారు. మృతులంతా బీహార్ రాష్ట్రంలోని గయా జిల్లాకు చెందిన వారని పోలీసులు గుర్తించారు. ఈ ప్రమాదంలో వినయ్ శ్రీవాస్తవ (53), అతని భార్య అర్చన శ్రీవాస్తవ (48), వారి కుమారుడు కృతార్థ్ శ్రీవాస్తవ (27) తోపాటు రవీంద్ర యాదవ్ (20), పురుషోత్తం కుమార్ (28) ప్రాణాలు కోల్పోయినట్లు అధికారులు వెల్లడించారు. ఈ కుటుంబం రాంచీలో జరిగిన తమ కుమార్తె వివాహ కార్యక్రమానికి హాజరై తిరుగు ప్రయాణంలో ఉండగా ఈ విషాదం చోటుచేసుకోవడం మరింత కలచివేసింది.
పోలీసుల ప్రాథమిక దర్యాప్తులో అతివేగమే ప్రమాదానికి ప్రధాన కారణమని వెల్లడైంది. వారణాసి నుండి గోరఖ్‌పూర్ వైపు వెళ్తున్న స్కార్పియో నియంత్రణ కోల్పోయి డివైడర్‌ను దాటి అవతలి వైపుకు వెళ్లడంతోనే ఈ ఘటన జరిగిందని ఘోసి వలయాధికారి జితేంద్ర కుమార్ సింగ్ తెలిపారు. అదే సమయంలో గోరఖ్‌పూర్ నుండి వారణాసి వైపు వస్తున్న ట్రైలర్ డ్రైవర్‌కు ప్రమాదాన్ని తప్పించుకునే అవకాశం లేకపోయిందని చెప్పారు. ప్రస్తుతం ఈ ఘటనపై కేసు నమోదు చేసి పోలీసులు పూర్తి స్థాయి దర్యాప్తు కొనసాగిస్తున్నారు. ఆనందంగా ముగిసిన పెళ్లి వేడుక తర్వాత ఇంటికి చేరుకోవాల్సిన కుటుంబం ఇలా శవాలుగా మారిపోవడంతో బంధువులు, స్థానికులు తీవ్ర దిగ్భ్రాంతికి గురయ్యారు. ఆ ప్రాంతమంతా విషాద ఛాయలు కమ్ముకున్నాయి.
ALSO READ: Telangana Rastra Sena: కొత్త విప్లవం.. తెలంగాణలో కవిత కొత్త పార్టీ