ఎండాకాలం ఉధృతమవుతున్న కొద్దీ మనుషులే కాకుండా మూగజీవాలు కూడా తీవ్ర ఇబ్బందులు పడుతున్నాయి. ముఖ్యంగా భూమి లోపల ఉండే ఉష్ణోగ్రతలు పెరగడంతో పాములు చల్లదనం కోసం తమ బొరియలను వదిలి బయటకు వస్తున్నాయి. ఈ సమయంలో అవి ఆహారం, నివాసం కోసం జనావాసాల వైపు చేరడం సహజ పరిణామంగా మారుతోంది. దీంతో గ్రామాలు, పట్టణాల్లో పాముల సంచారం పెరుగుతూ ప్రజల్లో భయాందోళనలు కలిగిస్తోంది. అయితే కొన్ని సరళమైన జాగ్రత్తలు పాటించడం, సహజ సిద్ధమైన మొక్కలను పెంచుకోవడం ద్వారా ఈ ప్రమాదాన్ని గణనీయంగా తగ్గించుకోవచ్చని నిపుణులు చెబుతున్నారు.
పాములు శీతల రక్త జీవులు కావడంతో అవి తమ శరీర ఉష్ణోగ్రతను స్వయంగా నియంత్రించుకోలేవు. బయట వాతావరణం ఎలా ఉంటే అవి కూడా అలాగే ప్రభావితమవుతాయి. ఎండాకాలంలో భూమి లోపల వేడి ఎక్కువవడంతో అవి బయటకు వచ్చి చల్లటి ప్రదేశాలను వెతుకుతాయి. ముఖ్యంగా రాత్రి వేళల్లో ఇళ్లలోని బాత్‌రూమ్‌లు, వంటగది మూలలు, తోటలు వంటి చల్లటి ప్రదేశాల్లోకి ప్రవేశించే అవకాశాలు ఎక్కువగా ఉంటాయి. ఇది మనకు తెలియకుండానే ప్రమాదకర పరిస్థితులకు దారితీసే అవకాశం ఉంటుంది.
ఇలాంటి పరిస్థితుల్లో సహజసిద్ధమైన మొక్కలు చాలా ఉపయోగకరంగా ఉంటాయి. ముఖ్యంగా స్నేక్ ప్లాంట్ పాములను దూరంగా ఉంచడంలో కీలక పాత్ర పోషిస్తుంది. ఈ మొక్క నుండి వెలువడే ఘాటైన వాసన పాములకు అసహ్యంగా ఉండటంతో అవి ఆ ప్రాంతానికి దగ్గరపడవు. ఇందులో ఉండే యూజినాల్ అనే రసాయనం పాముల నాసికా రంధ్రాలకు ఇబ్బంది కలిగించి వాటిని దూరంగా నెట్టేస్తుంది. అందుకే ఇంటి చుట్టూ కుండీల్లో ఈ మొక్కలను పెంచుకోవడం మంచిదని సూచిస్తున్నారు. ఒకవేళ మొక్కలు నాటే అవకాశం లేకపోతే, వాటి ఆకులను కోసి పలుచని గుడ్డలో కట్టి తలుపులు, కిటికీల వద్ద ఉంచినా కొంతవరకు ఫలితం ఉంటుంది. ఇదే విధంగా సర్పగంధ మొక్క, బంతి పూల మొక్కల వాసన కూడా పాములకు అసౌకర్యాన్ని కలిగించి వాటిని దరిచేరనివ్వదు.
మొక్కలు మాత్రమే కాకుండా ఇంటి పరిసరాలను పరిశుభ్రంగా ఉంచుకోవడం కూడా అత్యంత అవసరం. పాత టైర్లు, ఇటుకల కుప్పలు, పనికిరాని వస్తువులు పాములకు దాచుకునే ప్రదేశాలుగా మారతాయి. కాబట్టి వీటిని వెంటనే తొలగించడం ద్వారా ప్రమాదాన్ని తగ్గించుకోవచ్చు. అంతేకాకుండా పాములు ఎక్కువగా ఆహారం కోసం వస్తాయి కాబట్టి ఇంట్లో ఎలుకలు లేకుండా చూసుకోవడం చాలా ముఖ్యం. ఇలా చేస్తే పాములు వచ్చే అవకాశం దాదాపు 80శాతం వరకు తగ్గుతుందని నిపుణులు చెబుతున్నారు.
ఇంటి పరిసరాల్లో గడ్డి ఎక్కువగా పెరగకుండా తరచూ కత్తిరించడం కూడా చాలా అవసరం. పొడవాటి గడ్డిలో పాములు దాక్కునే అవకాశం ఉండటంతో అవి కనిపించకుండా ప్రమాదం కలిగిస్తాయి. అలాగే ఇంటి గోడల దగ్గర లేదా కిటికీల కింద ఉండే చిన్న రంధ్రాలను సిమెంట్‌తో మూసివేయడం ద్వారా పాములు లోపలికి ప్రవేశించకుండా అడ్డుకోవచ్చు. మొత్తానికి పాములను చంపడం కంటే అవి మన దరిచేరకుండా నివారించడం ఉత్తమ మార్గమని నిపుణులు స్పష్టం చేస్తున్నారు. సహజ సిద్ధమైన మార్గాలను అనుసరించడం, పరిసరాలను శుభ్రంగా ఉంచుకోవడం ద్వారా ఈ వేసవిలో మనం సురక్షితంగా ఉండవచ్చు.
ALSO READ: Chanakya Niti: చేతిలో డబ్బు నిలవట్లేదా..? ఈ తప్పులు అస్సలు చేయకండి!