China Rocket: అంతరిక్ష రంగంలో అగ్రదేశాల మధ్య పోటీ రోజురోజుకీ తీవ్రమవుతున్న తరుణంలో, అమెరికాకు సవాల్ విసురుతూ వేగంగా ముందుకు సాగుతున్న చైనాకు అనూహ్యమైన ఎదురుదెబ్బ తగిలింది. ప్రైవేట్ అంతరిక్ష ప్రయోగాల్లో కీలక పాత్ర పోషిస్తున్న స్పేస్ పయనీర్ సంస్థ ప్రతిష్ఠాత్మకంగా అభివృద్ధి చేసిన తియాన్‌లాంగ్-3 రాకెట్ పరీక్ష ఘోరంగా విఫలమైంది. హెనాన్ ప్రాంతంలోని గాంగ్‌యీ నగర సమీపంలో ఉన్న డాంగ్‌ఫెంగ్ కమర్షియల్ ఏరోస్పేస్ ఇన్నోవేషన్ కేంద్రం నుంచి ఈ పరీక్ష నిర్వహించగా, భూమిపై ఇంజిన్ పరీక్షలు చేస్తుండగానే సాంకేతిక లోపం తలెత్తి రాకెట్ అకస్మాత్తుగా గాల్లోకి ఎగిరిపోయింది. కొద్దిసేపటికే నియంత్రణ కోల్పోయిన రాకెట్ సమీప పర్వత ప్రాంతంలో కూలిపడి భారీ పేలుడుతో అగ్నిప్రమాదానికి కారణమైంది.
Remember the Chinese rocket that accidentally lifted off the pad during a test fire?
It just launched again today (intentionally this time).
Looks like it lost an engine at ~33 seconds into this video, then reportedly failed to make orbit. pic.twitter.com/lH4pMcgGGR
— Christian Keil (@pronounced_kyle) April 3, 2026
అమెరికాలోని స్పేస్ ఎక్స్ సంస్థకు పోటీగా నిలవాలనే లక్ష్యంతో ఈ తియాన్‌లాంగ్-3 రాకెట్‌ను అభివృద్ధి చేశారు. ఎలాన్ మాస్క్ ఆధ్వర్యంలోని ఫాల్కన్-9 తరహాలో రూపొందించిన ఈ రాకెట్ ద్వారా తక్కువ ఖర్చుతో ఉపగ్రహాలను అంతరిక్షంలోకి పంపాలనే ఆశలు చైనా పెట్టుకుంది. కానీ ప్రయోగం ప్రారంభమైన కొద్దిసేపటికే రాకెట్ నిర్మాణంలో లోపం బయటపడటం వల్ల అది విరిగి కూలిపోవడం, చైనా వాణిజ్య అంతరిక్ష ప్రణాళికలకు గట్టి దెబ్బగా మారింది. ముఖ్యంగా ప్రైవేట్ రంగాన్ని ముందుకు తీసుకువెళ్లి అంతరిక్షంలో ఆధిపత్యం సాధించాలనే వ్యూహానికి ఇది ప్రతికూల సంకేతంగా భావిస్తున్నారు.
ఈ ప్రమాదానికి సంబంధించిన దృశ్యాలు సోషల్ మీడియాలో విస్తృతంగా చక్కర్లు కొడుతున్నాయి. రాకెట్ మంటల్లో చిక్కుకుని కిందకు పడిపోతున్న దృశ్యాలు చూసి సమీప గ్రామాల ప్రజలు తీవ్ర భయాందోళనకు గురయ్యారు. అయితే, ప్రయోగానికి ముందు అధికారులు జాగ్రత్తగా పరిసర ప్రాంతాలను ఖాళీ చేయించడంతో ఎటువంటి ప్రాణనష్టం జరగలేదని స్థానిక యంత్రాంగం వెల్లడించింది. రాకెట్ శకలాలు జనవాసాలకు దూరంగా పడటంతో పెద్ద ప్రమాదం తప్పిందని నిపుణులు అభిప్రాయపడుతున్నారు.
ఈ ఘటన కేవలం ఒక పరీక్ష విఫలమవడం మాత్రమే కాకుండా, చైనా ప్రైవేట్ అంతరిక్ష రంగంలో భద్రతా ప్రమాణాలపై అనేక సందేహాలను రేకెత్తించింది. ప్రభుత్వం వాణిజ్య అంతరిక్ష రంగాన్ని ప్రోత్సహిస్తున్న సమయంలో ఇలాంటి సాంకేతిక లోపాలు పెట్టుబడిదారుల విశ్వాసంపై ప్రభావం చూపే అవకాశముంది. అయినప్పటికీ, లోపాలను సరిచేసి మరింత ఆధునిక సాంకేతికతతో తిరిగి ప్రయోగాలు చేపడతామని స్పేస్ పయనీర్ సంస్థ ప్రకటించింది. రాబోయే రోజుల్లో తియాన్‌లాంగ్-3 రాకెట్ మళ్లీ విజయవంతంగా ప్రయాణిస్తుందా లేదా అన్నది ఆసక్తిగా మారింది.
ALSO READ: YCP Protests: జగన్ మాస్టర్ స్ట్రోక్.. ఒకే దెబ్బకు రెండు పిట్టలు!