Telangana: విద్యార్థులకు మెరుగైన ఆరోగ్యం, బలమైన భవిష్యత్తు కల్పించాలనే లక్ష్యంతో తెలంగాణ రాష్ట్ర ప్రభుత్వం విద్యా రంగంలో కీలక మార్పులను అమలు చేస్తోంది. ఇప్పటికే పాఠశాలల్లో మధ్యాహ్న భోజనంతో పాటు అల్పాహారం అందించే నిర్ణయం తీసుకున్న ప్రభుత్వం, ఇప్పుడు మరో ముఖ్యమైన నిర్ణయంతో ముందుకు వచ్చింది. ఇప్పటివరకు మధ్యాహ్న భోజనంలో సన్నబియ్యం, గుడ్లు అందిస్తున్న ప్రభుత్వం ఇకపై విద్యార్థులకు చేపల కూరను కూడా వడ్డించాలని నిర్ణయించింది. విద్యార్థుల్లో పెరుగుతున్న పోషకాహార లోపాన్ని తగ్గించడమే ప్రధాన లక్ష్యంగా ఈ నిర్ణయం తీసుకున్నట్లు ప్రభుత్వం స్పష్టం చేసింది. ఈ నిర్ణయం అమల్లోకి వస్తే విద్యార్థులకు మరింత పోషక విలువలు లభించనున్నాయి.
ఈ విషయాన్ని అసెంబ్లీలో వెల్లడించిన మంత్రి వాకిటి శ్రీహరి పశుసంవర్ధక, మత్స్య, క్రీడల శాఖలపై సభ్యులు అడిగిన ప్రశ్నలకు సమాధానమిచ్చారు. రాష్ట్రంలోని ప్రభుత్వ పాఠశాలల్లో అమలు అవుతున్న మధ్యాహ్న భోజన పథకంలో చేపల కూరను చేర్చే అంశంపై ఇప్పటికే మంత్రివర్గ స్థాయిలో చర్చలు జరిగాయని, త్వరలోనే దీనిని అమల్లోకి తీసుకురానున్నామని ఆయన తెలిపారు. విద్యార్థులకు ఎలాంటి ఇబ్బంది కలగకుండా ఉండేందుకు ప్రత్యేక చర్యలు తీసుకుంటామని కూడా స్పష్టం చేశారు.
విద్యార్థులు సులభంగా తినే విధంగా తిలాపియా జాతికి చెందిన చేపలను ప్రత్యేకంగా పెంచి పాఠశాలలకు సరఫరా చేయాలని ప్రభుత్వం ప్రణాళిక రూపొందించింది. ఈ చేపల్లో పోషకాలు అధికంగా ఉండటంతో పాటు ముల్లు తక్కువగా ఉండటం వల్ల పిల్లలకు సురక్షితంగా ఉంటాయని అధికారులు భావిస్తున్నారు. ఈ చర్య ద్వారా విద్యార్థులకు ఆరోగ్యకరమైన ఆహారం అందించడమే కాకుండా, రాష్ట్రంలో మత్స్య రంగాన్ని కూడా అభివృద్ధి చేయాలని ప్రభుత్వం లక్ష్యంగా పెట్టుకుంది.
రాష్ట్రాన్ని అన్ని రంగాల్లో అగ్రస్థానంలో నిలిపేందుకు ప్రభుత్వం పలు చర్యలు తీసుకుంటుందని మంత్రి తెలిపారు. విద్యారంగంతో పాటు క్రీడారంగానికి కూడా ప్రాధాన్యత ఇస్తూ గ్రామస్థాయిలో క్రీడలను ప్రోత్సహించేందుకు ప్రత్యేక కార్యాచరణ రూపొందిస్తున్నట్లు వెల్లడించారు. ఈ నిర్ణయాలు అమల్లోకి వస్తే విద్యార్థుల ఆరోగ్యం, శారీరక దృఢత్వం, చదువులో పురోగతి వంటి అంశాల్లో గణనీయమైన మార్పులు చోటుచేసుకునే అవకాశముందని నిపుణులు అభిప్రాయపడుతున్నారు.
ALSO READ: Chiraya: మంచితనం ముసుగులో సైకో భర్త.. ఓటీటీలో ట్రెండ్ అవుతున్న సినిమా