Road Name: ప్రస్తుతం ప్రపంచవ్యాప్తంగా యుద్ధ వాతావరణం నెలకొన్న పరిస్థితుల్లో ఇరాన్, ఇజ్రాయెల్, అమెరికా దేశాల మధ్య ఉద్రిక్తతలు రోజురోజుకూ పెరుగుతున్నాయి. పరస్పర దాడులు, ప్రతిదాడులతో పరిస్థితి ఉద్రిక్తంగా మారుతున్న వేళ ఇరాన్ సుప్రీం లీడర్ అయతొల్లా అలీ ఖమేనీ మృతి ప్రపంచ రాజకీయాల్లో పెను ప్రకంపనలు సృష్టించింది. ఫిబ్రవరి 28న జరిగిన సంయుక్త దాడుల్లో ఖమేనీ ప్రాణాలు కోల్పోయినట్టు వెలుగులోకి రావడంతో యుద్ధ వాతావరణం మరింత ముదిరింది. ఈ పరిణామాల మధ్య హైదరాబాద్ మహానగరంలో ఖమేనీ పేరుతో ఓ రహదారి ఉందన్న విషయం వెలుగులోకి రావడం అనూహ్య చర్చకు దారితీసింది. ప్రపంచాన్ని కుదిపేస్తున్న ఒక నాయకుడి పేరు మన నగరంలో ఒక రహదారికి ఉండటం అనేక మందిని ఆశ్చర్యానికి గురి చేస్తోంది.
భాగ్యనగరంలో ఖమేనీ పేరుతో రహదారి ఉందన్న వార్త సామాజిక మాధ్యమాల్లో విస్తృతంగా వ్యాపించింది. ముఖ్యంగా బంజారాహిల్స్ ప్రాంతంలో ఈ పేరుతో రహదారి ఉండటం మరింత ఆసక్తిని రేకెత్తించింది. అయితే ఇక్కడ ఒక ముఖ్యమైన విషయం తరువాత స్పష్టమైంది. ప్రస్తుతం మృతి చెందిన అయతొల్లా అలీ ఖమేనీ పేరుతో కాకుండా, ఇరాన్ తొలి సుప్రీం లీడర్ రుహొల్లా ఖమేనీ జ్ఞాపకార్థమే ఆ రహదారికి ఈ పేరు పెట్టినట్టు వెల్లడైంది. ఈ విషయాన్ని చాలామంది ఇప్పటివరకు గుర్తించలేదని, తాజా యుద్ధ పరిణామాల నేపథ్యంలోనే ఇది వెలుగులోకి వచ్చిందని స్థానికులు చెబుతున్నారు. ఒక నెటిజన్ ఈ విషయాన్ని సామాజిక మాధ్యమ వేదికలో ప్రస్తావించడంతో ఈ అంశం మరింత చర్చనీయాంశమైంది.
హైదరాబాద్ నగరంలోని బంజారాహిల్స్ రోడ్ నెంబర్- 7ను అధికారికంగా ‘ఇమామ్ ఖమేనీ రోడ్’గా పిలుస్తారు. ప్రముఖ వ్యాపార కేంద్రం GVK One మాల్ ఎదురుగా ఉన్న ఈ రహదారి పేరు చాలా కాలంగా అధికారిక రికార్డుల్లో నమోదై ఉంది. ఇదే ప్రాంతంలో ఇరాన్ కాన్సులేట్ కార్యాలయం ఉండటంతో అప్పటి నగర పాలక సంస్థ ఈ నిర్ణయం తీసుకున్నట్టు సమాచారం. కుతుబ్ షాహీ పాలన కాలం నుంచే హైదరాబాద్, ఇరాన్ మధ్య సాంస్కృతిక, వాణిజ్య సంబంధాలు బలంగా కొనసాగుతున్నాయి. ఆ చారిత్రక అనుబంధానికి గుర్తుగా ఈ రహదారికి ఆ పేరు పెట్టినట్టు చెబుతున్నారు. అప్పటి ప్రభుత్వం కూడా ఈ పేరును అధికారిక పత్రాల్లో చేర్చినట్టు సమాచారం.
ఇరాన్ తొలి సుప్రీం లీడర్ రుహొల్లా ఖమేనీ పూర్వీకులకు భారతదేశంతో ఉన్న అనుబంధం కూడా ఈ పేరుకు కారణమై ఉండొచ్చని చరిత్రకారులు పేర్కొంటున్నారు. ఆయన పూర్వీకులు ఉత్తరప్రదేశ్ రాష్ట్రంలోని బారాబంకి జిల్లా కింతూరు ప్రాంతానికి చెందిన వారని చెప్పబడుతోంది. 19వ శతాబ్దంలో వారి కుటుంబం ఇరాన్‌కు వలస వెళ్లి అక్కడ రాజకీయాల్లో కీలక స్థానాన్ని సంపాదించడంతో ఈ చారిత్రక అనుబంధం మరింత బలపడింది. ఈ నేపథ్యమే హైదరాబాద్‌లో ఖమేనీ పేరుతో రహదారి ఏర్పడటానికి దోహదపడ్డట్టు విశ్లేషకులు అభిప్రాయపడుతున్నారు.
ఇదిలా ఉండగా తాజా దాడుల్లో అయతొల్లా అలీ ఖమేనీతో పాటు ఆయన కుటుంబ సభ్యులు ప్రాణాలు కోల్పోయినట్టు వెలువడిన సమాచారం అంతర్జాతీయ స్థాయిలో తీవ్ర స్పందనలకు దారితీసింది. తమ దేశంపై దాడి చేసిన దేశాలను వదిలిపెట్టబోమని ఇరాన్ ప్రకటించడంతో పరిస్థితి మరింత ఉద్రిక్తమైంది. ప్రపంచ రాజకీయాల్లో ఉద్రిక్తతలు కొనసాగుతున్న ఈ సమయంలో హైదరాబాద్ నగరంలో ఖమేనీ పేరుతో రహదారి ఉందన్న విషయం వెలుగులోకి రావడం విశేషంగా మారింది. యుద్ధ వాతావరణం, అంతర్జాతీయ రాజకీయ పరిణామాలు, చారిత్రక అనుబంధాలు అన్నీ కలిసిపోతూ ఈ అంశాన్ని మరింత ఆసక్తికరంగా మార్చాయి.
ALSO READ: Nagar kurnool: బాత్‌రూమ్‌లో మైనర్ బాలిక ప్రసవం.. చివరికి!