Iran: పశ్చిమ ఆసియాలో యుద్ధ మేఘాలు కమ్ముకున్న సమయంలో ఇరాన్ దేశాన్ని భూకంపం వణికించింది. ఇవాళ మధ్యాహ్నం గెరాష్ నగరాన్ని కేంద్రంగా చేసుకుని రిక్టర్ స్కేలుపై 4.3 తీవ్రతతో భూకంపం సంభవించినట్లు అధికారులు వెల్లడించారు. భూమి అంతర్భాగంలో సుమారు 10 కి.మీ లోతులో కంపనాల కేంద్రం నమోదైనట్లు భూకంప పరిశోధనా విభాగాలు పేర్కొన్నాయి. ఒక్కసారిగా నేల కంపించడంతో ప్రజలు ఇళ్ల నుంచి బయటకు పరుగులు తీశారు. కొన్ని ప్రాంతాల్లో స్వల్పంగా భవనాలు కంపించినట్లు స్థానికులు చెబుతున్నారు.
ఇటీవల అమెరికా, ఇజ్రాయెల్ దేశాలతో కొనసాగుతున్న తీవ్ర ఉద్రిక్తతల నేపథ్యంలో ఈ భూకంపం సంభవించడం గమనార్హంగా మారింది. యుద్ధ భయాందోళనలు నెలకొన్న వేళ ప్రకృతి విపత్తు తాకడం అక్కడి ప్రజల్లో మరింత ఆందోళన కలిగించింది. అయితే ఈ కంపనాలతో పెద్ద ఎత్తున ప్రాణనష్టం లేదా ఆస్తినష్టం జరిగిందా అనే విషయంపై ఇంకా పూర్తి స్థాయి సమాచారం బయటకు రాలేదు.
ప్రభావిత ప్రాంతాల్లో స్థానిక అధికారులు అప్రమత్తమై సహాయక చర్యలను పర్యవేక్షిస్తున్నారు. భవనాల స్థిరత్వంపై తనిఖీలు చేపట్టడంతో పాటు, ప్రజలు అప్రమత్తంగా ఉండాలని సూచిస్తున్నారు. పరిస్థితిని సమీక్షిస్తున్న అధికారులు మరిన్ని వివరాలను త్వరలో వెల్లడించే అవకాశం ఉంది.
ALSO READ: Pakistan: భారత్ యుద్దానికి రెడీ అవుతోంది: పాకిస్థాన్