Telangana Municipal: తెలంగాణ రాష్ట్రంలో మేయర్, చైర్మన్ ఎన్నికలు ఉత్కంఠభరిత వాతావరణంలో సాగాయి. పలు ప్రాంతాల్లో ఉద్రిక్త పరిస్థితుల మధ్య ఎన్నికల ప్రక్రియ కొనసాగగా, మరికొన్ని మున్సిపాలిటీల్లో అనివార్య కారణాలతో వాయిదా పడింది. రాష్ట్ర వ్యాప్తంగా మున్సిపల్ పాలకవర్గాల ఏర్పాటు ప్రక్రియకు సోమవారం కీలక దశగా భావించినప్పటికీ, కొన్ని చోట్ల చోటుచేసుకున్న పరిణామాలు అధికారులను అప్రమత్తం చేశాయి. ఎన్నికల నిర్వహణలో ఎలాంటి అంతరాయం లేకుండా చర్యలు తీసుకున్నప్పటికీ 11 మున్సిపాలిటీల్లో ఎన్నికలను తాత్కాలికంగా నిలిపివేయాల్సి వచ్చినట్లు ఎన్నికల సంఘం అధికారులు వెల్లడించారు.
రాష్ట్రంలో మొత్తం 116 మున్సిపాలిటీలకు చైర్మన్, వైస్ చైర్మన్ పదవులు, 7 మున్సిపల్ కార్పొరేషన్లకు మేయర్, డిప్యూటీ మేయర్ పదవుల భర్తీ కోసం ఎన్నికలు నిర్వహించాల్సి ఉంది. ఈ క్రమంలో ఎక్కువ శాతం ప్రాంతాల్లో పోలింగ్, ఓట్ల లెక్కింపు ప్రశాంతంగా పూర్తయ్యాయి. అయితే కొన్ని పట్టణాల్లో సభ్యుల గైర్హాజరు, న్యాయపరమైన అభ్యంతరాలు, సాంకేతిక కారణాలు తదితర అంశాల నేపథ్యంలో ఎన్నికలను వాయిదా వేసినట్లు అధికారులు స్పష్టం చేశారు.
ఇల్లందు, సుల్తానాబాద్, ఇబ్రహీంపట్నం, కాగజ్ నగర్, కేతనపల్లి, ఖానాపూర్, జహీరాబాద్, ఇంద్రేశం, డోర్నకల్, జనగామ, తొర్రూరు మున్సిపాలిటీలలో ఎన్నికలు వాయిదా పడ్డాయి. ఈ ప్రాంతాల్లో పరిస్థితులను సమీక్షించి త్వరలోనే మళ్లీ ఎన్నికల తేదీ ప్రకటిస్తామని ఎన్నికల సంఘం తెలిపింది. ఇప్పటికే అవసరమైన భద్రతా ఏర్పాట్లు కొనసాగుతున్నాయని, ఎన్నికలు సజావుగా నిర్వహించేందుకు అన్ని చర్యలు తీసుకుంటామని అధికారులు పేర్కొన్నారు.
రాష్ట్ర రాజకీయ వర్గాల్లో ఈ పరిణామాలు చర్చనీయాంశంగా మారాయి. కొన్ని చోట్ల రాజకీయ విభేదాలు తీవ్రరూపం దాల్చడం, మరికొన్ని ప్రాంతాల్లో న్యాయపరమైన సమస్యలు తలెత్తడం వల్ల ఎన్నికలు వాయిదా పడినట్లు సమాచారం. రేపటిలోగా ఈ ఎన్నికలు నిర్వహించే అవకాశముందని అధికార వర్గాలు సూచిస్తున్నాయి. మొత్తం మీద మేయర్, చైర్మన్ ఎన్నికల ప్రక్రియ రాష్ట్ర రాజకీయాల్లో కీలక మలుపుగా మారగా, వాయిదా పడ్డ ప్రాంతాలపై ప్రత్యేక దృష్టి నెలకొంది.
ALSO READ: Andhra Pradesh: ముగిసన బిల్ గేట్స్ పర్యటన