Pension: సమాజంలోని ఆర్థికంగా బలహీన వర్గాలకు భరోసా కల్పించే లక్ష్యంతో తెలంగాణ ప్రభుత్వం అమలు చేస్తున్న ‘చేయూత’ పథకం రాష్ట్రంలో కీలక సంక్షేమ కార్యక్రమంగా కొనసాగుతోంది. వృద్ధులు, ఒంటరి మహిళలు, వితంతువులు, దివ్యాంగులు, బీడీ కార్మికులు, మూత్రపిండాల శుద్ధి చికిత్స పొందుతున్న రోగులు, రోగనిరోధక శక్తి తగ్గించే వ్యాధులతో బాధపడుతున్నవారు వంటి అనేక వర్గాలకు నెలనెలా ఆర్థిక సాయం అందించడం ద్వారా జీవనోపాధికి ఆధారం కల్పిస్తోంది. ఎన్నికల సమయంలో ఇచ్చిన హామీల అమలు దిశగా ప్రభుత్వం దశలవారీ ప్రణాళికను పరిశీలిస్తున్నట్లు సమాచారం.
రాష్ట్ర ఆర్థిక పరిస్థితులను దృష్టిలో ఉంచుకుని, ఒకేసారి భారీ పెంపు కాకుండా తొలి విడతగా ప్రస్తుతం అందిస్తున్న పింఛన్ మొత్తంపై రూ.500 అదనంగా చేర్చే ప్రతిపాదనపై ప్రభుత్వం ఆలోచన చేస్తున్నట్లు తెలుస్తోంది. ప్రస్తుతానికి వృద్ధులు, వితంతువులు, ఇతర వర్గాలు పొందుతున్న రూ.2,016 పింఛన్ రూ.2,516కి పెరిగే అవకాశం ఉంది. అదే విధంగా దివ్యాంగులకు అందుతున్న రూ.4,016 పింఛన్ రూ.4,516కి చేరే సూచనలు కనిపిస్తున్నాయి. ఈ పెంపు అమలైతే లబ్ధిదారులకు కొంత ఉపశమనం లభించనుంది.
అయితే పింఛన్ పెంపు నిర్ణయం రాష్ట్ర ఖజానాపై గణనీయమైన భారం మోపనుంది. ప్రస్తుతం పింఛన్ల పంపిణీ కోసం ప్రభుత్వం నెలకు సుమారు రూ.950 కోట్లు వెచ్చిస్తోంది. ఈ మొత్తంపై అదనంగా రూ.500 చేర్చడం వల్ల సంవత్సరానికి దాదాపు రూ.2,500 కోట్ల అదనపు వ్యయం తలెత్తుతుందని ఆర్థిక వర్గాలు అంచనా వేస్తున్నాయి. సంక్షేమ రంగానికి భారీ కేటాయింపులు అవసరమయ్యే పరిస్థితి ఏర్పడుతుందని అభిప్రాయపడుతున్నారు.
వచ్చే ఎన్నికల నాటికి పింఛన్ మొత్తాన్ని రూ.4,000 నుంచి రూ.6,000 స్థాయికి పెంచాలనే లక్ష్యం సాధించాలంటే రాష్ట్ర బడ్జెట్‌లో సంక్షేమానికి కేటాయించే నిధులను మరింత పెంచాల్సి ఉంటుంది. ఇదొక సాహసోపేత నిర్ణయంగా భావించబడుతున్నప్పటికీ, పెరుగుతున్న నిత్యావసరాల ధరల నేపథ్యంలో పేదలపై పడుతున్న భారాన్ని తగ్గించేందుకు ఇది అవసరమనే అభిప్రాయాలు వ్యక్తమవుతున్నాయి.
రూ.500 పెంపు లబ్ధిదారులకు కొంత ఊరటనిచ్చే అవకాశం ఉన్నా.. ఎన్నికల హామీలను పూర్తి స్థాయిలో ఎప్పటిలోగా అమలు చేస్తారన్నది ఆసక్తికరంగా మారింది. సంక్షేమం, ఆర్థిక నియంత్రణ మధ్య సమతుల్యత సాధించడం ప్రభుత్వానికి ప్రధాన సవాలుగా నిలుస్తోంది.
ALSO READ: Brutal incident: ప్రేమ పెళ్లికి ఒప్పుకోలేదని తల్లి, తమ్ముడిని చంపిన మైనర్ అమ్మాయి