Operation Octopus: దేశవ్యాప్తంగా పెరుగుతున్న సైబర్ నేరాలపై కఠిన చర్యలు తీసుకుంటూ హైదరాబాద్ పోలీసులు మరోసారి తమ సామర్థ్యాన్ని చాటుకున్నారు. విస్తృత స్థాయిలో ప్రణాళికాబద్ధంగా నిర్వహించిన ఈ ప్రత్యేక దాడుల్లో సంచలన విషయాలు వెలుగులోకి వచ్చాయి. ఆపరేషన్ ఆక్టోపస్ (Operation Octopus) పేరుతో చేపట్టిన ఈ భారీ కార్యాచరణలో దేశంలోని 16 రాష్ట్రాల్లో ఒకేసారి దాడులు నిర్వహించి సైబర్ నేరాల ముఠాలను ఛేదించారు. ఈ సమగ్ర చర్యల ఫలితంగా మొత్తం 104 మందిని అదుపులోకి తీసుకున్నారు. నేరాలకు ఉపయోగిస్తున్న 152 బ్యాంకు ఖాతాలను స్తంభింపజేసి, అక్రమ లావాదేవీలకు చెక్ పెట్టారు.
అరెస్టయిన వారిలో కేవలం నకిలీ ఖాతాదారులే కాకుండా కొందరు బ్యాంకు సిబ్బంది కూడా ఉండటం పరిస్థితి తీవ్రతను సూచిస్తోంది. ప్రజల డబ్బు భద్రతకు బాధ్యత వహించాల్సిన వ్యవస్థలోనే కొంతమంది ఉద్యోగులు నేరగాళ్లకు సహకరించడం కలకలం రేపుతోంది. నిందితుల వద్ద నుంచి 204 మొబైల్ ఫోన్లు, 141 సిమ్ కార్డులు, 234 డెబిట్ కార్డులు, 26 ల్యాప్‌టాప్‌లు, 56 ముద్రలు, అలాగే రూ.36 లక్షల నగదు స్వాధీనం చేసుకున్నారు.
ఇటీవలి కాలంలో సైబర్ మోసాలు రోజురోజుకూ పెరుగుతూ సాధారణ ప్రజలను తీవ్ర ఆందోళనకు గురిచేస్తున్నాయి. కష్టపడి సంపాదించిన సొమ్ము ఒక్క క్షణంలో మాయమవుతుందనే భయం ప్రతి ఖాతాదారుని వెంటాడుతోంది. ఇలాంటి సమయంలో ఖాతాదారులకు అవగాహన కల్పించాల్సిన, మోసాలను అడ్డుకోవాల్సిన బాధ్యత గల కొంతమంది బ్యాంకు ఉద్యోగులే నేరగాళ్లకు తోడ్పడటం ప్రజల్లో ఆగ్రహాన్ని రేకెత్తిస్తోంది. కంచె చేను మేసినట్లుగా వ్యవస్థలోని లోపాలు బయటపడటంతో విశ్వాసంపై ప్రశ్నలు తలెత్తుతున్నాయి.
ఈ ఆపరేషన్ ద్వారా సైబర్ నేర ముఠాల పని తీరు, డబ్బు మార్గాలు, ఖాతాల వినియోగం వంటి అంశాలపై కీలక సమాచారం లభించినట్లు పోలీసులు వెల్లడించారు. దేశవ్యాప్తంగా విస్తరించిన ఈ ముఠాలపై మరిన్ని దర్యాప్తులు కొనసాగుతున్నాయి. ప్రజలు అప్రమత్తంగా ఉండాలని, అనుమానాస్పద లావాదేవీలపై వెంటనే ఫిర్యాదు చేయాలని పోలీసులు సూచిస్తున్నారు. సైబర్ నేరాలకు వ్యతిరేకంగా సమగ్ర పోరాటం కొనసాగుతుందని స్పష్టం చేశారు.
ALSO READ: Recovery: ఎగ్గొట్టిన డబ్బులను ఈజీగా ఎలా వసూలు చేసుకోవాలో తెలుసా?