Mahashivratri: మహా శివరాత్రి సమీపిస్తున్న వేళ భక్తులందరిలో ఆధ్యాత్మిక ఉత్సాహం నెలకొంది. ఈసారి ఫిబ్రవరి 15న దేశవ్యాప్తంగా హిందువులు మహా శివరాత్రి పర్వదినాన్ని ఘనంగా జరుపుకోనున్నారు. పరమశివుని ఆరాధనకు అత్యంత పవిత్రమైన ఈ రాత్రి భక్తి, ఉపవాసం, జాగరణతో ప్రత్యేకంగా నిలుస్తుంది. ఈ రోజు భక్తితో శివుడిని పూజించిన వారికి ఆయురారోగ్యాలు, ఐశ్వర్యం, శాంతి కలుగుతాయని పండితులు పేర్కొంటున్నారు. అయితే ఈ పవిత్రమైన దినంలో కొన్ని నియమాలు తప్పనిసరిగా పాటించాల్సి ఉంటుందని, కొన్ని తప్పులను అస్సలు చేయరాదని ఆధ్యాత్మిక వేత్తలు హెచ్చరిస్తున్నారు.
ముఖ్యంగా మహా శివరాత్రి రోజున ధరించే దుస్తుల విషయంలో జాగ్రత్త అవసరమని చెబుతున్నారు. నలుపు, నీలం రంగుల దుస్తులు ఈ రోజున ధరించడం మంచిది కాదని పండితుల అభిప్రాయం. ఇవి ప్రతికూల ప్రభావాలను కలిగించే అవకాశముందని విశ్వసిస్తారు. బదులుగా తెలుపు లేదా పసుపు రంగు దుస్తులు ధరించి శివపూజ చేయడం శుభప్రదమని సూచిస్తున్నారు. ఈ విధంగా శుభ్రత, సాత్వికతకు ప్రతీకలైన రంగులు ధరించడం ద్వారా శివానుగ్రహం సులభంగా లభిస్తుందని నమ్మకం.
శివపూజలో ఉపయోగించే పత్రాలు, పుష్పాల విషయంలో కూడా అప్రమత్తంగా ఉండాలని పండితులు సూచిస్తున్నారు. కొంతమంది తెలియక తులసి దళాలను శివలింగానికి సమర్పిస్తుంటారు. అయితే తులసి మహావిష్ణువుకు ప్రీతికరమైనదిగా భావించబడుతుంది. అందువల్ల శివపూజలో తులసి ఉపయోగించడం శాస్త్రోక్తంగా కాదని చెబుతున్నారు. శివలింగానికి బిల్వదళాలు సమర్పించడం అత్యంత శ్రేయస్కరమని, అది శివుడికి అత్యంత ప్రీతికరమని ఆధ్యాత్మిక గ్రంథాలు వివరిస్తాయి.
అదేవిధంగా కేతకి, చంపక వంటి కొన్ని పుష్పాలను శివుడికి సమర్పించరాదని పురాణాలలో ప్రస్తావన ఉంది. ఈ పూలు శివారాధనలో వర్జ్యమైనవిగా పరిగణించబడతాయి. అవి సమర్పించడం వలన శివుడు ఆగ్రహిస్తాడనే నమ్మకం ఉంది. అందువల్ల శివపూజలో పుష్పాలను ఎంపిక చేసే సమయంలో భక్తులు జాగ్రత్తగా ఉండాలి.
పూజ సమయంలో మనస్సు ప్రశాంతంగా, నిశ్చలంగా ఉండటం అత్యంత ముఖ్యమని పండితులు పేర్కొంటున్నారు. కోపం, ఆందోళన, ద్వేషం వంటి భావాలను దూరంగా ఉంచి, స్వచ్ఛమైన మనసుతో శివారాధన చేయాలి. శివుడికి సమర్పించే పుష్పాలు, పళ్లు, అక్షింతలు విరిగినవి కాకూడదు. సంపూర్ణంగా, శుభ్రంగా ఉన్నవే సమర్పించాలి. ఇది పూజా విధానంలో అత్యంత ముఖ్యమైన అంశంగా భావించబడుతుంది.
మరికొంత మంది మహా శివరాత్రి రోజున ఉపవాసం పాటించకుండా, స్నానం చేయకముందే భోజనం చేసే పరిస్థితులు కనిపిస్తాయి. అయితే ఇది శాస్త్రోక్తంగా సరైంది కాదని పండితులు హెచ్చరిస్తున్నారు. ఉపవాసం చేయలేని వారు అయినా సరే, ఉదయం పవిత్రస్నానం చేసి, శివుడికి నమస్కరించి, తరువాత ఆహారం తీసుకోవాలని సూచిస్తున్నారు. శరీర శుద్ధి, మనోశుద్ధితో చేసిన పూజే ఫలప్రదమవుతుందని ఆధ్యాత్మిక వేత్తలు స్పష్టం చేస్తున్నారు.
ఈ విధంగా నియమ నిష్ఠలతో, భక్తి శ్రద్ధలతో మహా శివరాత్రిని ఆచరించిన వారికి శివకృప ప్రసాదమై జీవితం సుఖశాంతులతో నిండుతుందని విశ్వాసం.
ALSO READ: Girl Assault: నాలుగు కార్లలో బాలికపై సామూహిక అత్యాచారం.. ఆపై!