Interesting fact: తెల్లవారుజామున కోడి కూయడం అనేది మన జీవితాల్లో తరతరాలుగా కనిపిస్తున్న సహజ దృశ్యం. ఒకప్పుడు అలారం గడియారాలు లేని రోజుల్లో కోడి కూతే మనకు టైమ్ చెప్పే సంకేతం. “కోడి కూయగానే లేవాలి” అనే మాటలు పెద్దవాళ్ల నోట ఇప్పటికీ వినిపిస్తూనే ఉంటాయి. అయితే, రోజులో మిగతా సమయాల్లో కాకుండా కోడి ముఖ్యంగా ఉదయాన్నే ఎందుకు కూస్తుంది అనే ప్రశ్న చాలా మందికి ఎప్పుడో ఒకసారి వచ్చి ఉండే ఉంటుంది. ఇది కేవలం అలవాటు కాదు.. దీని వెనుక శాస్త్రీయ కారణాలు, సహజ స్వభావం, జీవన విధానానికి సంబంధించిన అంశాలు దాగి ఉన్నాయి.
కోడుల శరీరంలో సహజంగా పనిచేసే ఒక జీవ గడియారం ఉంటుంది. దీనినే శాస్త్రీయంగా “సిర్కాడియన్ రిథమ్” అని పిలుస్తారు. ఈ జీవ గడియారం కోడి శరీరాన్ని 24 గంటల కాలచక్రానికి అనుగుణంగా నడిపిస్తుంది. రాత్రి విశ్రాంతి తీసుకోవడం, ఉదయం మేల్కొనడం, ఆహారం కోసం చురుగ్గా మారడం వంటి అంశాలన్నీ ఈ గడియారం ఆధారంగానే జరుగుతాయి. ముఖ్యంగా సూర్యోదయం సమీపిస్తున్న సమయంలో వెలుతురు క్రమంగా పెరుగుతుండటాన్ని ఈ జీవ గడియారం వెంటనే గుర్తిస్తుంది. దాంతో కోడి శరీరంలో చురుకుదనం పెరిగి, రోజు మొదలైందనే సంకేతం అందుతుంది.
కోడుల కళ్లకు వెలుతురు పట్ల అత్యంత సున్నితమైన స్పందన ఉంటుంది. మన కళ్లకు ఇంకా చీకటిగా అనిపించే సమయానికే, కోడి కళ్లకు వెలుతురు మార్పు స్పష్టంగా కనిపిస్తుంది. సూర్యుడు పూర్తిగా ఉదయించకముందే ఆకాశంలో వచ్చే స్వల్ప కాంతిని కూడా కోడి వెంటనే గుర్తిస్తుంది. ఈ కాంతి మార్పు కోడి మెదడుకు సంకేతంగా మారి, శరీరంలోని హార్మోన్లను చురుగ్గా పనిచేసేలా చేస్తుంది. దాని ఫలితంగా కోడి కూయడం ప్రారంభిస్తుంది. అందుకే చాలా సార్లు సూర్యుడు కనబడకముందే కోడి కూత వినిపిస్తుంది.
ఇది కేవలం శరీర సంబంధమైన ప్రక్రియ మాత్రమే కాదు.. కోడి సామాజిక ప్రవర్తనలో భాగం కూడా. కోళ్లు గుంపులుగా జీవించే జంతువులు. ఒక గుంపులోని ఇతర కోళ్లకు రోజు ప్రారంభమైందని తెలియజేయడానికి కోడి కూత ఉపయోగపడుతుంది. “ఇక మేల్కొనాల్సిన సమయం వచ్చింది” అనే సందేశాన్ని తన కూత ద్వారా సమూహానికి చేరవేస్తుంది. అలాగే తన పరిధిలో ఉన్న ఇతర మగ కోళ్లకు హెచ్చరికగా కూడా కోడి కూస్తుంది. ఇది తన ప్రాంతాన్ని ప్రకటించుకునే సహజ విధానం.
కొన్ని సందర్భాల్లో ఆడ కోళ్లను ఆకర్షించడానికి కూడా మగ కోడి కూయడం చేస్తుంది. తన ఉనికిని, బలాన్ని చూపించే సంకేతంగా ఈ కూత ఉపయోగపడుతుంది. అందుకే ప్రతి కోడి కూత ఒకే విధంగా ఉండదు. వయస్సు, ఆరోగ్యం, పరిసరాలపై ఆధారపడి కూతలో తేడాలు కనిపిస్తాయి. ఇది ప్రకృతిలో సహజంగా కొనసాగుతున్న ఒక కమ్యూనికేషన్ విధానం.
శతాబ్దాలుగా కోడి కూతను కాలానికి చిహ్నంగా పరిగణిస్తూ వస్తున్నారు. ముఖ్యంగా గ్రామీణ ప్రాంతాల్లో రైతులు ఉదయం పనులకు వెళ్లే సమయాన్ని కోడి కూత ఆధారంగా నిర్ణయించేవారు. పశువులను మేపడానికి, పొలాల పనులు మొదలుపెట్టడానికి కోడి కూతే ఒక సూచికగా ఉండేది. ఆధునిక కాలంలో గడియారాలు, మొబైల్ ఫోన్లు వచ్చాక కూడా, అనేక ప్రాంతాల్లో కోడి కూతకు ఉన్న ప్రాముఖ్యత తగ్గలేదు.
సహజ ప్రపంచంలోని పగలు- రాత్రి చక్రాన్ని ప్రతిబింబించే అంశాల్లో కోడి కూతకు ప్రత్యేక స్థానం ఉంది. కోడి కూయడం అనేది కేవలం ఒక శబ్దం కాదు.. అది ప్రకృతిలో రోజు మొదలవుతున్నదని చెప్పే సంకేతం. ఇతర జంతువుల ప్రవర్తనపై కూడా దీని ప్రభావం ఉంటుంది. పక్షులు కదలడం, జంతువులు మేల్కొనడం వంటి మార్పులు కోడి కూతతో మొదలవుతాయి. అందుకే కోడి కూయడం అనేది సహజ జీవన చక్రంలో విడదీయరాని భాగంగా నిలుస్తోంది.
ALSO READ: Meta, Whatsappకి సుప్రీంకోర్టు స్ట్రాంగ్ వార్నింగ్‌