Harvard University: తెలంగాణ సీఎం రేవంత్‌రెడ్డి అమెరికాలోని ప్రపంచ ప్రఖ్యాత హార్వర్డ్ యూనివర్సిటీలో లీడర్షిప్ కోర్సును విజయవంతంగా పూర్తి చేశారు. హార్వర్డ్ యూనివర్సిటీలోని ప్రతిష్టాత్మక కెన్నెడీ స్కూల్ ఆఫ్ గవర్నమెంట్‌లో నిర్వహించిన ప్రత్యేక శిక్షణా కార్యక్రమంలో పాల్గొని సర్టిఫికెట్‌ను అందుకున్నారు. అంతర్జాతీయ స్థాయిలో గుర్తింపు పొందిన ఈ కోర్సును పూర్తి చేయడం ద్వారా సీఎం రేవంత్‌రెడ్డి మరో మైలురాయిని సాధించినట్లుగా భావిస్తున్నారు.
ఈ నెల 25 నుంచి 30వ తేదీ వరకు ‘లీడర్షిప్ ఫర్ ది ట్వంటీ ఫస్ట్ సెంచరీ’ పేరిట ఈ కోర్సును నిర్వహించారు. ఆధునిక పాలన, నాయకత్వ నైపుణ్యాలు, నిర్ణయాల సామర్థ్యం వంటి అంశాలపై ఈ తరగతుల్లో విశ్లేషణాత్మకంగా చర్చ జరిగింది. భవిష్యత్ సవాళ్లను ఎదుర్కొనే నాయకత్వ లక్షణాలపై ప్రత్యేక దృష్టి సారించినట్లు సమాచారం. హార్వర్డ్ కెన్నెడీ స్కూల్‌లో జరిగిన ఈ తరగతులకు ప్రపంచవ్యాప్తంగా 20 దేశాల నుంచి వచ్చిన సుమారు 60 మంది విద్యార్థులు హాజరయ్యారు. వివిధ దేశాలకు చెందిన నాయకులు, పాలన రంగంలో పనిచేస్తున్న ప్రముఖులతో కలిసి సీఎం రేవంత్‌రెడ్డి శిక్షణ పొందారు. విభిన్న అనుభవాలు, ఆలోచనల మధ్య జరిగిన చర్చలు ఎంతో ఉపయోగకరంగా నిలిచాయని ఆయన పేర్కొన్నారు.
ఈ కోర్సు సందర్భంగా అధ్యాపకులు, తోటి విద్యార్థుల నుంచి అనేక విషయాలు నేర్చుకున్నట్లు సీఎం తెలిపారు. పాలనలో తీసుకునే నిర్ణయాలు ప్రజల జీవితాలపై ఎలా ప్రభావం చూపుతాయన్న అంశంపై లోతైన అవగాహన కలిగిందని అన్నారు. అంతర్జాతీయ స్థాయి నాయకత్వ పాఠాలు తనకు ప్రేరణనిచ్చాయని అభిప్రాయపడ్డారు. కోర్సు పూర్తైన అనంతరం హార్వర్డ్ కెన్నెడీ స్కూల్ నుంచి సీఎం రేవంత్‌రెడ్డికి సర్టిఫికెట్ అందజేశారు. ఈ సందర్భంగా నిర్వహించిన కార్యక్రమంలో పలువురు ప్రముఖులు పాల్గొన్నారు. ప్రపంచ స్థాయి విద్యాసంస్థ నుంచి సర్టిఫికెట్ పొందడం తెలంగాణకు గర్వకారణమని రాజకీయ వర్గాలు వ్యాఖ్యానిస్తున్నాయి.